ബാഗ്ദാദ്– തെക്കന് ഇറാഖിലെ ബസ്രയിലുള്ള വൈദ്യുതി നിലയത്തിലുണ്ടായ വന് തീപിടിത്തത്തില് നാല് പേര് മരിക്കുകയും 30 പേര്ക്ക് പരിക്കേല്ക്കുകയും ചെയ്തു. മരണസംഖ്യ ഇനിയും ഉയര്ന്നേക്കാമെന്ന് സുരക്ഷാ ഉദ്യോഗസ്ഥര് അറിയിച്ചു.
ബസ്രയ്ക്ക് വടക്കുള്ള ഹാര്ത്ത വൈദ്യുതി നിലയത്തിലാണ് അപകടമുണ്ടായത്. അഗ്നിശമന സേനാംഗങ്ങള് തീ നിയന്ത്രണവിധേയമാക്കിയതായി ഇറാഖിന്റെ ഔദ്യോഗിക വാര്ത്താ ഏജന്സിയായ ഇറാഖ് ന്യൂസ് ഏജന്സി (ഐ.എന്.എ) റിപ്പോര്ട്ട് ചെയ്തു. തീ സമീപത്തെ വീടുകളിലേക്കും പടര്ന്നുപിടിച്ചിരുന്നു. അപകടത്തെത്തുടര്ന്ന് നിലയത്തിന്റെ പ്രവര്ത്തനം പൂര്ണ്ണമായും നിര്ത്തിവെച്ചു.

800 മെഗാവാട്ട് ഉല്പ്പാദന ശേഷിയുള്ള ഹാര്ത്ത പവര് സ്റ്റേഷന്, തീപിടിത്തമുണ്ടാകുന്ന സമയത്ത് ഏകദേശം 400 മെഗാവാട്ട് ശേഷിയിലാണ് പ്രവര്ത്തിച്ചിരുന്നത്. തീപിടിത്തത്തിന്റെ കാരണമോ നാശനഷ്ടങ്ങളുടെ കൃത്യമായ കണക്കുകളോ ഇതുവരെ പുറത്തുവിട്ടിട്ടില്ല.
പതിറ്റാണ്ടുകളായി വേണ്ടത്ര നിക്ഷേപമില്ലാത്തതും കൃത്യമായ അറ്റകുറ്റപ്പണികള് നടക്കാത്തതും കാരണം ഇറാഖിലെ വൈദ്യുതി മേഖല കടുത്ത പ്രതിസന്ധിയിലാണ്. കഠിനമായ വേനല്ക്കാലത്ത് ആവശ്യത്തിനനുസരിച്ച് വൈദ്യുതി വിതരണം ചെയ്യാന് കഴിയാത്ത സാഹചര്യമാണുള്ളത്. സബ്സ്റ്റേഷനുകളിലും വൈദ്യുതി നിലയങ്ങളിലും മുന്പും ഉണ്ടായിട്ടുള്ള തീപിടിത്തങ്ങളും സാങ്കേതിക തകരാറുകളും രാജ്യത്ത് വ്യാപകമായ വൈദ്യുതി മുടക്കത്തിന് കാരണമായിട്ടുണ്ട്.



