ന്യൂദൽഹി- മന്ത്രിസഭയിൽ തർക്കങ്ങളുണ്ടാകാറുണ്ടെന്നും ഏകപക്ഷീയമായ തീരുമാനങ്ങളെടുക്കാൻ ഇത് പിണറായി വിജയന്റെ മന്ത്രിസഭയല്ലെന്നും മുഖ്യമന്ത്രി വി.ഡി സതീശൻ. യു.ഡി.എഫ് മന്ത്രിസഭയുടെ പ്രവർത്തനശൈലിയും കൂട്ടായ ജനാധിപത്യ ബോധ്യത്തിലാണ് അധിഷ്ഠിതമായിരിക്കുന്നത്. മന്ത്രിസഭയിലെ എല്ലാ തീരുമാനങ്ങളും വിശദമായ ചർച്ചകൾക്കും കൂട്ടായ ആലോചനകൾക്കും ശേഷമാണ് ഏകകണ്ഠമായി കൈക്കൊള്ളുന്നത്. എല്ലാ മന്ത്രിമാർക്കും ചർച്ചകളിൽ അഭിപ്രായം രേഖപ്പെടുത്താൻ തുല്യ അവസരമുണ്ട്. ഒരു വിഷയത്തിൽ സമവായത്തിലെത്താൻ കഴിയാത്തപക്ഷം അത് മാറ്റിവെച്ച് കൂടുതൽ ചർച്ചകൾക്ക് ശേഷം തീരുമാനമെടുക്കും. ഏകപക്ഷീയമായ തീരുമാനങ്ങൾക്കു പകരം കൂട്ടായ ഉത്തരവാദിത്വത്തിനും ജനാധിപത്യപരമായ ചർച്ചകൾക്കും പ്രാധാന്യം നൽകുന്ന ഭരണസംസ്കാരമാണ് യു.ഡി.എഫ് സർക്കാർ ഉയർത്തിപ്പിടിക്കുന്നതെന്നും മുഖ്യമന്ത്രി പറഞ്ഞു.
ആറുമാസം എന്നത് ഒരു സർക്കാരിന്റെ പ്രവർത്തനങ്ങൾ വിലയിരുത്താൻ ചെറിയ കാലയളവാണെങ്കിലും, ഈ ചുരുങ്ങിയ സമയത്തിനുള്ളിൽ പ്രതീക്ഷിച്ചതിലേറെ കാര്യങ്ങൾ നടപ്പാക്കാൻ യു.ഡി.എഫ് സർക്കാരിന് സാധിച്ചിട്ടുണ്ട്. ജനങ്ങൾക്ക് നൽകിയ വാഗ്ദാനങ്ങൾ ഓരോന്നായി നിറവേറ്റുന്നതിനൊപ്പം നിരവധി ക്ഷേമപദ്ധതികൾക്ക് അടിത്തറ പാകാനും കഴിഞ്ഞു. പ്രിയദർശിനി സർവീസ് ആരംഭിച്ചതും മുതിർന്ന പൗരന്മാർക്കായി പ്രത്യേക വകുപ്പ് രൂപീകരിച്ചതും ഈ കാലയളവിലെ പ്രധാന നേട്ടങ്ങളാണ്.
കേരളത്തിലെ സാധാരണക്കാരുടെ വരുമാനം വർധിപ്പിക്കുന്നതിനുള്ള നടപടികളിലും സർക്കാർ വിജയകരമായ മുന്നേറ്റം നടത്തി. ക്ഷേമപദ്ധതികളിലെ കുടിശ്ശികകൾ തീർത്ത് ജനങ്ങൾക്ക് നൽകിയ ഉറപ്പുകൾ പാലിച്ചു. സരൾ കേരളം പദ്ധതിയും മിഷൻ സമുദ്രയുടെ ഭാഗമായി നടപ്പാക്കാനൊരുങ്ങുന്ന മാരിടൈം നിയമവും സംസ്ഥാനത്തിന്റെ വികസനത്തിന് പുതിയ ദിശാബോധം നൽകും. കേരളത്തിന്റെ തീരദേശത്തെ തുറമുഖ നഗരങ്ങളുടെ ശൃംഖലയാക്കി മാറ്റുന്നതിനുള്ള ബൃഹത്തായ പദ്ധതിയാണ് ആവിഷ്കരിച്ചിരിക്കുന്നത്. ഏവിയേഷൻ മേഖലയിലും വലിയ മുന്നേറ്റത്തിനുള്ള സാധ്യതകൾ തുറക്കുകയാണ്. കേരളത്തെ ആഗോളതലത്തിൽ ശ്രദ്ധേയമായ ടൂറിസം ഡെസ്റ്റിനേഷനാക്കി മാറ്റുന്നതിനും ഭിന്നശേഷിക്കാർക്ക് മികച്ച സേവനങ്ങളും സൗകര്യങ്ങളും ഉറപ്പാക്കുന്നതിനും സർക്കാർ പ്രതിജ്ഞാബദ്ധമാണ്. സഹാനുഭൂതിയോടെയുള്ള സദ്ഭരണമാണ് ലക്ഷ്യം.
സർക്കാർ ഓഫീസുകളിൽ കെട്ടിക്കിടക്കുന്ന ഫയലുകൾ സമയബന്ധിതമായി തീർപ്പാക്കും. ഭാവിയിൽ ഇത്തരം സാഹചര്യം ആവർത്തിക്കാതിരിക്കാൻ ആർട്ടിഫിഷ്യൽ ഇന്റലിജൻസിന്റെ സഹായത്തോടെ കാര്യക്ഷമമായ സംവിധാനവും ഒരുക്കും. ഭരണനിർവഹണം കൂടുതൽ വേഗതയുള്ളതും സുതാര്യവും ജനസൗഹൃദവുമാക്കുകയാണ് ലക്ഷ്യമെന്നും മുഖ്യമന്ത്രി പറഞ്ഞു.



