ദോഹ– മേഖലയിലെ സംഘർഷം അവസാനിപ്പിക്കുന്നത് സംബന്ധിച്ച് അമേരിക്കയും ഇറാനും തമ്മിൽ നടത്തുന്ന ചർച്ചകൾ പരാജയപ്പെട്ടെന്ന രീതിയിൽ പുറത്തുവരുന്ന വാർത്തകൾ തള്ളി ഖത്തർ. പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുറഹ്‌മാൻ അൽഥാനിയുടെ പരാമർശങ്ങൾ വളച്ചൊടിച്ചുള്ള ഇത്തരം റിപ്പോർട്ടുകൾ തെറ്റായതും തെറ്റിദ്ധരിപ്പിക്കുന്നതുമാണെന്ന് ഖത്തർ വ്യക്തമാക്കി.
നിലവിലുള്ള നയതന്ത്ര ശ്രമങ്ങളെ അട്ടിമറിക്കാനും മേഖലയിൽ അസ്ഥിരത വളർത്താനും ആഗ്രഹിക്കുന്ന ചില കേന്ദ്രങ്ങളാണ് ഇത്തരം വ്യാജ പ്രചാരണങ്ങൾക്ക് പിന്നിലെന്ന് ഖത്തർ ഇന്റർനാഷണൽ മീഡിയ ഓഫീസ് പ്രസ്താവനയിൽ വ്യക്തമാക്കി. ഇരുപക്ഷവും കരാറിലെത്താനുള്ള ശ്രമങ്ങൾ തുടരുകയാണെന്ന് പ്രധാനമന്ത്രി വ്യക്തമാക്കിയിട്ടുണ്ടെന്നും അതിൽ പറയുന്നു.
മേഖലയിലെ യുദ്ധ സാഹചര്യത്തിൽ നിന്ന് ലാഭമുണ്ടാക്കാൻ ശ്രമിക്കുന്നവരാണ് ഇത്തരം വ്യാജ വാർത്തകൾ പ്രചരിപ്പിക്കുന്നത്. മധ്യസ്ഥരെന്ന നിലയിൽ ചർച്ചകൾ വിജയത്തിലെത്തിക്കാൻ ഇരുരാജ്യങ്ങളുമായും ഖത്തർ ഉദ്യോഗസ്ഥർ നിരന്തരം ആശയവിനിമയം നടത്തുന്നുണ്ടെന്നും പ്രസ്താവനയിലുണ്ട്.
നേരത്തെയും പ്രാദേശിക തർക്കങ്ങളിലും അന്താരാഷ്ട്ര വിഷയങ്ങളിലും വിജയികരമായി മധ്യസ്ഥത വഹിച്ച ചരിത്രം ഖത്തറിനുണ്ട്. ചർച്ചകളുടെ കൂടുതൽ വിശദാംശങ്ങൾ വെളിപ്പെടുത്തിയില്ലെങ്കിലും, ഇരുപക്ഷവും തമ്മിലുള്ള ചർച്ചകൾ സജീവമായി പുരോഗമിക്കുകയാണെന്ന് ഖത്തർ ഉറപ്പുനൽകുന്നു.