ജിദ്ദ- വിശുദ്ധ ഖുർആൻ മുസ്ഹഫിന്റെ രണ്ട് ചട്ടക്കൂടുകളിൽ ഒതുക്കപ്പെട്ട കേവലമൊരു പുസ്തകമല്ലെന്നും അത് മനുഷ്യർക്ക് ജീവിത വിജയം കൈവരിക്കാൻ ആവശ്യമായ സകല ഗൈഡൻസുകളും ഉൾകൊള്ളുന്ന ദൈവിക ഗ്രന്ഥമാണെന്നത് സമൂഹം ഉൾക്കൊള്ളണമെന്നും ജെ.ഡി.സി.സി. സംഘടിപ്പിച്ച ഖുർആൻ ഹദീസ് ലേണിംഗ് കോഴ്സ് പഠിതാക്കളുടെ സംഗമം ഉൽബോധിപ്പിച്ചു. ചരിത്രത്തിലെ ഏറ്റവും അധർമകാരികളായി അറിയപ്പെടുന്ന ഒരു സമൂഹത്തെ ലോകത്തിലെ ഏറ്റവും മാതൃകാ സമൂഹമായി പരിവർത്തിപ്പിച്ചത് വിശുദ്ധഖുർആനാണ്. വിശുദ്ധ ഖുർആൻ കേൾക്കുന്നത് പോലും അരോചകമാകുന്ന ആധുനിക മുസ്ലിംകൾ ഖുർആനിന്റെ ആശയങ്ങളെ വക്രീകരിച്ച് പുതിയ സങ്കൽപങ്ങൾ മെനഞ്ഞെടുത്ത് സമൂഹത്തെ വഴികേടിലേക്ക് നയിക്കുകയാണെന്ന് സംഗമത്തിൽ ‘ഖുർആൻ ഹൃദയത്തിന്റെ വസന്തം’ എന്ന വിഷയം അവതരിപ്പിച്ചുകൊണ്ട് സംസാരിച്ച റാഫി സ്വലാഹി പ്രസ്താവിച്ചു.
ഖുർആനുമായി ബന്ധപ്പെട്ടതെല്ലാം അനുഗ്രഹീതമാണെന്നും വിശുദ്ധ ഖുർആന്റെ പ്രഥമ ശ്രോദ്ധാക്കളായ സ്വഹാബത് ജീവിച്ച മാർഗം പിന്തുടരുന്നതിലൂടെ മാത്രമേ ആധുനിക സമൂഹത്തിനും സൻമാർഗം പുൽകാൻ സാധിക്കുകയുള്ളൂവെന്നും അത്തഹ്സീൻ ഖുർആൻ അക്കാദമി ഡയറക്ടർ സകരിയ്യ നൂഹ് മദീനി ഉൽബോധിപ്പിച്ചു. സംഗമത്തിൽ ‘ഖുർആനും സലഫുകളും’ എന്ന വിഷയത്തിൽ മുഖ്യപ്രഭാഷണം നിർവഹിച്ചുകൊണ്ട് സംസാരിക്കുകയായിരുന്നു അദ്ദേഹം.
കഴിഞ്ഞ ഒരു പതിറ്റാണ്ടുകാലമായി വിസ്ഡം സൗദിയുടെ കീഴിൽ ദേശീയാടിസ്ഥാനത്തിൽ തന്നെ ക്യു എച്ച് എൽ സി എന്ന പേരിൽ ഖുർആൻ പഠനത്തിനായി വ്യവസ്ഥാപിത സംവിധാനം നിലവിലുണ്ട്. ജിദ്ധയിൽ ഷറഫിയ്യ, ഖാലിദ് ബിൻ വലീദ്, മഹ്ജർ, ഹയ്യു സാമിർ, ഹയ്യു സഫാ, അസീസിയ തുടങ്ങിയ പ്രദേശങ്ങളിലെ ക്ലാസുകളിലായി സ്ത്രീകളും പുരുഷന്മാരുമടക്കം നൂറുക്കണക്കിന് മലയാളികൾ ഈ സംരംഭത്തിന്റെ ഭാഗമായി പഠനം നടത്തി വരുന്നു. പന്ത്രണ്ട് ഘട്ടങ്ങൾ പിന്നിട്ട് ഈ പഠന സംരംഭം പതിമൂന്നാം ഘട്ടത്തിലേക്ക് പ്രവേശിച്ചിരുന്നു. ജിദ്ദ സനാഇയ്യ ദഅവാ സെന്റർ ഓഡിറ്റോറിയത്തിൽ നടന്ന സംഗമം ശൈഖ് അബ്ദുൽ അസീസ് മുഹമ്മദ് ഇദ്രീസ് ഉൽഘാടനം ചെയ്തു.
പന്ത്രണ്ടാം ഘട്ട പരീക്ഷയിൽ നൂറിൽ നൂറ് മാർക്ക് നേടി സൗദി ദേശീയ തലത്തിൽ ഒന്നാം റാങ്ക് കരസ്ഥമാക്കിയ ജിദ്ദയിലെ പഠിതാക്കളായ നൗഷാദ് കൊച്ചുകോയ, ബിൻത് സുൽഫികർ, 99 മാർക്ക് നേടി രണ്ടാം റാങ്ക് പങ്കിട്ട സുമയ്യ അബ്ദുൽ ജബ്ബാർ, സലീന മൂന്നും നാലും റാങ്ക് ജേതാക്കളായ ശബ്നം ഫാദി കണ്ണൂർ, ഷൈമ അബ്ദുസ്സലാം കിഡ്സ് വിഭാഗം പരീക്ഷയിൽ ഒന്നാം റാങ്ക് കരസ്ഥമാക്കിയ അവ്വാഹ് ബിൻ നൗഫൽ തുടങ്ങിയവരെ സംഗമത്തിൽ ആദരിച്ചു. ശൈഖ് അബ്ദുൽ അസീസ് സമ്മാനങ്ങളും സർട്ടിഫിക്കറ്റുകളും വിതരണം ചെയ്തു.
മക്ക ദാറുൽ ഹദീസ് വിദ്യാർത്ഥി ഹാഫിള് ജാസിം ഇഖ്ബാൽ ഖിറാഅത് നടത്തി. ഖുർആൻ ഹദീസ് ലേണിംഗ് സ്‌കൂൾ പഠിതാവ് കബീർ സാഹിബ് ഗാനമാലപിച്ചു. സംഗമത്തിന്റെ ഭാഗമായി ജെ.ഡി.സി.സി. യൂത്ത് വിംഗ് കുട്ടികൾക്കായി കളിച്ചങ്ങാടം പരിപാടി നടത്തി. ജിദ്ദ ദഅവാ കോർഡിനേഷൻ കമ്മിറ്റി ജനറൽ സെക്രട്ടറി ഫൈസൽ വാഴക്കാട്, ട്രഷറർ നബീൽ പാലപ്പറ്റ, സൽമാൻ ബാലുശ്ശേരി, ഇഖ്ബാൽ തൃക്കരിപ്പൂർ, അബ്ദുൽ ജബ്ബാർ വെട്ടുപാറ, അബ്ദുൽ ഹഖ് മട്ടന്നൂർ, സൗബാൻ മൊറയൂർ, അബ്ദുൽ ഗനി ചെംനാട്, റഷീദലി എലത്തൂർ, അഫീഫ്, അബ്ദുൽ ജബ്ബാർ തിരൂരങ്ങാടി തുടങ്ങിയവർ പരിപാടികൾ നിയന്ത്രിച്ചു.
ജെ.ഡി.സി.സി. എഡ്യൂക്കേഷൻ സെക്രട്ടറി നൗഫൽ പീടിയേക്കൽ സ്വാഗതവും ഖുർആൻ ഹദീസ് ലേണിംഗ് കോഴ്സ് നാഷണൽ വിംഗ് പ്രതിനിധി റൗനഖ് ഓടക്കൽ നന്ദിയും പറഞ്ഞു.