അമ്മാൻ: ജോർദാൻ തലസ്ഥാനമായ അമ്മാന്റെ തെക്കുഭാഗത്തുള്ള കരക് പ്രവിശ്യയിലെ ഗ്രീക്ക് ഓർത്തഡോക്‌സ് പള്ളിയിലുണ്ടായ ഭീകരാക്രമണത്തിൽ മരിച്ചവരുടെ എണ്ണം എട്ടായി ഉയർന്നു. ഗുരുതരമായി പരിക്കേറ്റ് ചികിത്സയിലായിരുന്ന ഒരാൾ കൂടി മരണപ്പെട്ടതോടെയാണിതെന്ന് ജോർദാൻ ആരോഗ്യ മന്ത്രി ഇബ്രാഹിം അൽബദൂർ അറിയിച്ചു.
മറ്റൊരാളുടെ നില ഇപ്പോഴും ഗുരുതരമായി തുടരുകയാണ്. ആക്രമണത്തിൽ പരിക്കേറ്റ 26 പേർ നിലവിൽ വിവിധ ആശുപത്രികളിൽ ചികിത്സയിലുണ്ട്.
കഴിഞ്ഞ ദിവസം, അമ്മാനിൽ നിന്ന് 118 കിലോമീറ്റർ തെക്കുമാറിയുള്ള കരക് പ്രവിശ്യയിലെ പള്ളിക്ക് അകത്തും പുറത്തുമായി ആയുധധാരികൾ നടത്തിയ വെടിവെപ്പിൽ ഏഴു പേർ കൊല്ലപ്പെടുകയും 37 പേർക്ക് പരിക്കേൽക്കുകയും ചെയ്തതായി അധികൃതർ അറിയിച്ചിരുന്നു. പള്ളിയിൽ ശവസംസ്‌കാര ചടങ്ങ് നടക്കുമ്പോൾ മൂന്ന് ഭീകരർ വെടിയുതിർത്തുകൊണ്ട് പ്രധാന കവാടത്തിലേക്ക് നീങ്ങുന്ന ദൃശ്യങ്ങൾ ഔദ്യോഗിക അൽമംലക ടി.വി സംപ്രേഷണം ചെയ്തിട്ടുണ്ട്. ജോർദാനിൽ ഇത്തരം ആക്രമണങ്ങൾ അപൂർവമാണ്.
കുറ്റവാളികൾക്ക് കഠിനശിക്ഷ ഉറപ്പാക്കും: അബ്ദുല്ല രണ്ടാമൻ രാജാവ്
ഭീകരാക്രമണം നടത്തിയ കുറ്റവാളികൾക്ക് കഠിനമായ ശിക്ഷ ഉറപ്പാക്കുമെന്ന് ജോർദാനിലെ അബ്ദുല്ല രണ്ടാമൻ രാജാവ് വ്യക്തമാക്കി. രാജ്യത്തിന്റെ സുരക്ഷ തകർക്കാൻ ശ്രമിക്കുന്നവരെ കർശനമായി നേരിടുമെന്ന് അദ്ദേഹം പറഞ്ഞു.
“വഞ്ചനയുടെ വെടിയുണ്ടകൾ കൊണ്ട് ജോർദാൻ ജനതയുടെ ഐക്യം തകർക്കാമെന്ന് കരുതിയവരുടെ ശ്രമങ്ങളെ ജനങ്ങളുടെ ദൃഢതയും ഒത്തൊരുമയും കൊണ്ട് പരാജയപ്പെടുത്തിയിരിക്കുകയാണ്,” എന്ന് ആക്രമണത്തിന് പിന്നാലെ എക്‌സ് പ്ലാറ്റ്‌ഫോമിൽ പങ്കുവെച്ച കുറിപ്പിൽ രാജാവ് വ്യക്തമാക്കി.
സുരക്ഷ ശക്തമാക്കി
3,75,000ത്തോളം ജനസംഖ്യയുള്ള കരക് ഗവർണറേറ്റിൽ ഹൽസ, ഹിജാസീൻ ഗോത്രങ്ങൾ ഉൾപ്പെടെ വലിയൊരു വിഭാഗം ക്രിസ്ത്യൻ സമൂഹമാണ് വസിക്കുന്നത്. കരകിലെ ആക്രമണത്തെ തുടർന്ന് രാജ്യത്തെ പ്രമുഖ ഷോപ്പിംഗ് മാളുകൾ, വിദേശ എംബസികൾ തുടങ്ങി പ്രധാന കേന്ദ്രങ്ങളിലെല്ലാം സുരക്ഷാ മുൻകരുതലുകൾ ശക്തമാക്കിയതായി അമ്മാനിലെ യു.എസ് എംബസി പ്രസ്താവനയിലൂടെ അറിയിച്ചു. സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും എംബസി വ്യക്തമാക്കി.