അബുദാബി– യു.എ.ഇയും സൗദി അറേബ്യയും ഒരേ സുരക്ഷയും വിധിയുമാണ് പങ്കിടുന്നതെന്ന് യു.എ.ഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ് പ്രസ്താവിച്ചു. ഇരുരാജ്യങ്ങളും തമ്മിലുള്ള തന്ത്രപരമായ പങ്കാളിത്തമാണ് ഗൾഫ് മേഖലയുടെ സ്ഥിരതയുടെയും സമൃദ്ധിയുടെയും അടിസ്ഥാനശിലയെന്നും അദ്ദേഹം കൂട്ടിച്ചേർത്തു. സൗദി പ്രതിരോധ മന്ത്രി ഖാലിദ് ബിൻ സൽമാൻ രാജകുമാരന്റെ വിജയകരമായ യു.എ.ഇ സന്ദർശനത്തിന്റെയും യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽനഹ്‌യാനുമായുള്ള കൂടിക്കാഴ്ചയുടെയും പശ്ചാത്തലത്തിൽ ‘എക്സ്’ പ്ലാറ്റ്‌ഫോമിൽ കുറിച്ച സന്ദേശത്തിലാണ് അദ്ദേഹം ഇക്കാര്യം വ്യക്തമാക്കിയത്.
പരസ്പര വിശ്വാസം, പൊതുതാൽപ്പര്യങ്ങൾ, ഭരണാധികാരികളുടെ വിവേകം എന്നിവയിലാണ് ഈ പങ്കാളിത്തം അധിഷ്ഠിതമായിരിക്കുന്നത്. പ്രതിസന്ധി ഘട്ടങ്ങളിൽ ഇരുരാജ്യങ്ങളിലെയും ഭരണാധികാരികൾ പുലർത്തുന്ന ആത്മാർഥതയും വിവേകവും ഇതിൽ സംശയം ഉന്നയിക്കുന്നവർക്കുള്ള ശക്തമായ മറുപടിയാണെന്നും ഗർഗാഷ് ചൂണ്ടിക്കാട്ടി.
ഉയർന്നതല ചർച്ചകൾ പൂർത്തിയായി
സന്ദർശനത്തിനെത്തിയ സൗദി പ്രതിരോധ മന്ത്രി ഖാലിദ് ബിൻ സൽമാൻ രാജകുമാരൻ അബുദാബിയിലെ അൽഷാത്തി കൊട്ടാരത്തിൽ വെച്ചാണ് യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽനഹ്‌യാനുമായി കൂടിക്കാഴ്ച നടത്തിയത്. പ്രാദേശിക സംഭവവികാസങ്ങൾ, മേഖലയിലെ സുരക്ഷ, നിലവിലെ മുൻഗണനകൾ എന്നിവ യോഗത്തിൽ ചർച്ചയായി.
യു.എ.ഇ വൈസ് പ്രസിഡന്റും ഉപപ്രധാനമന്ത്രിയുമായ ശൈഖ് മൻസൂർ ബിൻ സായിദ് അൽനഹ്‌യാൻ, അബുദാബി ഡെപ്യൂട്ടി ഭരണാധികാരിയും ദേശീയ സുരക്ഷാ ഉപദേഷ്ടാവുമായ ശൈഖ് തഹ്നൂൻ ബിൻ സായിദ് അൽനഹ്‌യാൻ തുടങ്ങി ഇരുരാജ്യങ്ങളിലെയും ഉയർന്ന ഉദ്യോഗസ്ഥരും നയതന്ത്രജ്ഞരും ചർച്ചകളിൽ പങ്കെടുത്തു.
സൗദി പ്രതിരോധ മന്ത്രിയുമായി ശൈഖ് മൻസൂർ ബിൻ സായിദ് അൽനഹ്‌യാൻ പ്രത്യേക കൂടിക്കാഴ്ച നടത്തി മേഖലയിലെ തുടർച്ചയായ ഏകോപനത്തിന്റെയും സംയുക്ത സഹകരണത്തിന്റെയും പ്രാധാന്യം ഊട്ടിയുറപ്പിച്ചു. വിമാനത്താവളത്തിലെ സ്വീകരണത്തിനും യാത്രയയപ്പിനും ശൈഖ് മൻസൂർ നേതൃത്വം നൽകി.