കയ്റോ– ഹൂത്തി ആക്രമണങ്ങളുടെ പശ്ചാത്തലത്തിൽ സൗദി അറേബ്യയുടെ സുരക്ഷയും പരമാധികാരവും സംരക്ഷിക്കുന്നതിനായി, ആവശ്യമെങ്കിൽ സൈനിക പിന്തുണ നൽകുന്നതിന് പാർലമെന്റിന്റെ അനുമതി തേടുമെന്ന് ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽസീസി. ഇതിനായി പാർലമെന്റിന്റെ അടിയന്തര സമ്മേളനം വിളിച്ചുചേർക്കാൻ നിർദ്ദേശം നൽകിയതായി അദ്ദേഹം അറിയിച്ചു. ഈജിപ്ഷ്യൻ മിലിട്ടറി അക്കാദമിയിലെ ബിരുദദാന ചടങ്ങിൽ സംസാരിക്കുകയായിരുന്നു അദ്ദേഹം.
സൗദി അറേബ്യ ആവശ്യപ്പെടുകയാണെങ്കിൽ അവരുടെ സംരക്ഷണം ഉറപ്പാക്കാൻ ആവശ്യമായ എന്ത് നടപടിയും ഈജിപ്ത് സ്വീകരിക്കുമെന്ന് അൽസീസി വ്യക്തമാക്കി. സൽമാൻ രാജാവ്, കിരീടാവകാശി മുഹമ്മദ് ബിൻ സൽമാൻ രാജകുമാരൻ എന്നിവരുടെ അഭ്യർഥനകളെ അടിസ്ഥാനമാക്കിയായിരിക്കും ഈ നടപടികൾ.
“സൗദി അറേബ്യയിൽ ഏതെങ്കിലും തരത്തിൽ ഈജിപ്ത് ഇടപെടുകയാണെങ്കിൽ അത് ആക്രമണോന്മുഖമായിരിക്കില്ല, മറിച്ച് പൂർണ്ണമായും പ്രതിരോധപരമായ നടപടിയായിരിക്കും. മറ്റൊരു രാജ്യത്തിനെതിരെ യുദ്ധം ചെയ്യാനോ ആക്രമണം നടത്താനോ ഈജിപ്ത് ഉദ്ദേശിക്കുന്നില്ല.” — അബ്ദുൽ ഫത്താഹ് അൽസീസി, ഈജിപ്ഷ്യൻ പ്രസിഡന്റ്
സൗദി അറേബ്യക്കും മറ്റ് ഗൾഫ് രാജ്യങ്ങൾക്കും ഒപ്പം ഈജിപ്ത് ഉറച്ചുനിൽക്കും. മുൻകാലങ്ങളിൽ ഗൾഫ് രാജ്യങ്ങൾ ഈജിപ്തിന് നൽകിയ പിന്തുണയെ സ്മരിച്ച അദ്ദേഹം, മേഖലയിലെ സംഘർഷങ്ങൾ അവസാനിപ്പിക്കേണ്ടതിന്റെ ആവശ്യകതയും ചൂണ്ടിക്കാട്ടി.