റിയാദ്: റിയാദിലേക്കുള്ള യാത്രയ്ക്കിടെ ജിദ്ദയിൽനിന്ന് കാണാതായ വയനാട് സ്വദേശിയായ നഴ്സിനെ കണ്ടെത്തി. ഇവർ ജിദ്ദ പോലീസിന്റെ കസ്റ്റഡിയിലുണ്ട് എന്നാണ് വിവരം. വയനാട് സുൽത്താൻ ബത്തേരിക്കടുത്ത് നീലഗിരി ജില്ലാ അതിർത്തിയിലെ അയ്യങ്കൊല്ലി ആനന്ദ് നിവാസിൽ രവി – ശെൽവി ദമ്പതികളുടെ മകളാണ് ഫിലോമിന. നിരോധിത മരുന്ന് കൈവശം വെച്ചതാണ് അറസ്റ്റിലേക്ക് നയിച്ചത്.
കഴിഞ്ഞ മൂന്ന് വർഷമായി റിയാദിലെ കിംഗ് ഫഹദ് ആശുപത്രിയിൽ നഴ്‌സായി ജോലി ചെയ്തുവരികയാണ് ഫിലോമിന. വാർഷികാവധി കഴിഞ്ഞ് ഈ മാസം പത്തിന് ബംഗളൂരുവിൽ നിന്നുള്ള വിമാനത്തിലാണ് അവർ ജിദ്ദയിലേക്ക് യാത്ര തിരിച്ചത്. ജിദ്ദയിൽ നിന്നും കണക്ഷൻ ഫ്ലൈറ്റ് വഴി റിയാദിലേക്ക് എത്താനായിരുന്നു പദ്ധതി.
ജിദ്ദയിൽ വിമാനമിറങ്ങിയ ഉടൻ രാത്രി എട്ടരയോടെ ഫിലോമിന പിതാവ് രവിക്കും ഭർത്താവ് ജോണിനും ഒരു ശബ്ദസന്ദേശം അയച്ചിരുന്നു. ജിദ്ദ വിമാനത്താവളത്തിൽ ഉദ്യോഗസ്ഥർ തന്നെ തടഞ്ഞുവെച്ചിരിക്കുകയാണെന്നും ലഗേജ് കൊണ്ടുപോയെന്നും ഫോൺ ആവശ്യപ്പെടുന്നുണ്ടെന്നും ആ സന്ദേശത്തിൽ പറഞ്ഞിരുന്നു. എന്നാൽ ഇതിനുശേഷം ഫിലോമിനയുമായി ബന്ധപ്പെടാൻ സാധിച്ചിട്ടില്ലെന്നും യാതൊരു വിവരവുമില്ലെന്നും കുടുംബാംഗങ്ങൾ വ്യക്തമാക്കിയിരുന്നു. പിന്നീട് സാമൂഹ്യ പ്രവർത്തകർ അന്വേഷിച്ചപ്പോഴാണ് പോലീസ് കസ്റ്റഡിയിലുള്ള വിവരം ലഭിച്ചത്.