തെഹ്റാൻ- അമേരിക്ക ഏർപ്പെടുത്തിയ വ്യോമയാന നിയന്ത്രണങ്ങൾക്കും ഉപരോധങ്ങൾക്കും എതിരെ ഇറാൻ ഐക്യരാഷ്ട്രസഭയിൽ ഔദ്യോഗികമായി പരാതി നൽകി. തങ്ങളുടെ വ്യോമയാന മേഖലയ്ക്കെതിരെയുള്ള ഉപരോധങ്ങൾ മൂലം വിമാന സർവീസുകൾ റദ്ദാക്കേണ്ടി വന്ന പശ്ചാത്തലത്തിലാണ് ഇറാൻ ഈ നിർണായക നീക്കം നടത്തിയിരിക്കുന്നത്.
ഈ മാസം ഇറാനിലെ മുഴുവൻ വ്യോമയാന മേഖലയ്ക്കും മേൽ നിയന്ത്രണങ്ങൾ കടിഞ്ഞാണിട്ട അമേരിക്ക, ഈ മേഖലയെ സഹായിക്കുന്ന വിദേശ കമ്പനികൾക്കെതിരെ കർശന നടപടിയുണ്ടാകുമെന്ന് മുന്നറിയിപ്പ് നൽകിയിരുന്നു. ഇതിനെത്തുടർന്ന് കഴിഞ്ഞ ബുധനാഴ്ച ഉപരോധങ്ങൾ പ്രാബല്യത്തിൽ വരികയും, വിവിധ രാജ്യങ്ങൾ വിലക്കേർപ്പെടുത്തുകയും ചെയ്തതോടെ പ്രമുഖ ഇറാൻ വിമാനക്കമ്പനികൾക്ക് തങ്ങളുടെ അന്താരാഷ്ട്ര സർവീസുകൾ നിർത്തിവെക്കേണ്ടി വന്നു.
ഇറാൻ വിമാന കമ്പനികൾ യു.എ.ഇ സർവീസുകൾ നിർത്തിവെച്ചു
വ്യോമയാന മേഖലയുടെ ന്യായമായ അവകാശങ്ങൾ സംരക്ഷിക്കാനും അമേരിക്കയുടെ നിയമവിരുദ്ധ നിയന്ത്രണങ്ങളെ പ്രതിരോധിക്കാനുമായി ഐക്യരാഷ്ട്രസഭക്ക് കീഴിലുള്ള ഇന്റർനാഷണൽ സിവിൽ ഏവിയേഷൻ ഓർഗനൈസേഷന് ഔദ്യോഗികമായി പ്രതിഷേധക്കുറിപ്പ് സമർപ്പിച്ചതായി ഇറാൻ സിവിൽ ഏവിയേഷൻ മേധാവി അബൂസർ ഷിറൂദി വ്യക്തമാക്കി.
ഇതിനുപുറമെ, വിദേശകാര്യ മന്ത്രാലയവുമായി സഹകരിച്ച് ഹേഗിലെ അന്താരാഷ്ട്ര നീതിന്യായ കോടതിയിലും പരാതി ഫയൽ ചെയ്തിട്ടുണ്ടെന്നും അബൂസർ ഷിറൂദി ഔദ്യോഗിക വാർത്താ ഏജൻസിയായ ‘ഇർന’യോട് പറഞ്ഞു.