ഷാര്ജ – റോഡ് യാത്രക്കാരുടെ ജീവന് അപകടത്തിലാക്കുന്ന ഗുരുതരമായ ഗതാഗത നിയമലംഘനങ്ങള് നടത്തിയതിന് രണ്ട് ഡ്രൈവര്മാരെ ഷാര്ജ പോലീസ് അറസ്റ്റ് ചെയ്തതായി അധികൃതര് അറിയിച്ചു. ഡ്രൈവര്മാര് അശ്രദ്ധമായും അപകടകരമായും വാഹനമോടിച്ചതായി കണ്ടെത്തിയതിനെ തുടര്ന്ന് നടത്തിയ അന്വേഷണത്തിലാണ് ഇവരെ തിരിച്ചറിയാനും അറസ്റ്റ് ചെയ്യാനും സാധിച്ചത്. രണ്ട് വാഹനങ്ങളും കണ്ടുകെട്ടിയതായും നിയമനടപടി നേരിടാന് ഡ്രൈവര്മാരെ പബ്ലിക് പ്രോസിക്യൂഷന് കൈമാറിയതായും പോലീസ് സ്ഥിരീകരിച്ചു.
ഡ്രൈവര്മാരില് ഒരാള് നിയമലംഘനങ്ങള് രേഖപ്പെടുത്തുകയും അപകടകരമായ ഡ്രൈവിംഗ് സ്വഭാവം പ്രദര്ശിപ്പിക്കുകയും ചെയ്യുന്ന വീഡിയോ ക്ലിപ്പുകള് ചിത്രീകരിച്ച് സോഷ്യല് മീഡിയ പ്ലാറ്റ്ഫോമില് അപ്ലോഡ് ചെയ്യുകയായിരുന്നു. ഈ വീഡിയോകള് കുറ്റവാളിയെ കണ്ടെത്താന് അധികാരികളെ സഹായിച്ചു.
സമാനമായ കുറ്റകൃത്യങ്ങളുമായി ബന്ധപ്പെട്ട് രണ്ടാമത്തെ ഡ്രൈവര്ക്ക് വാഹനമോടിക്കുന്നതില് നിന്ന് വിലക്കേര്പ്പെടുത്തിയിരുന്നു. ഇത് ലംഘിച്ചാണ് ഇയാള് വീണ്ടും അശ്രദ്ധമായും അപകടകരമായും വാഹനമോടിച്ചതെന്ന് അന്വേഷണത്തില് കണ്ടെത്തി. ഇയാള്ക്ക് ആവര്ത്തിച്ച് ഗതാഗത നിയമങ്ങള് ലംഘിച്ചതിന്റെയും കുറ്റകൃത്യങ്ങളുടെയും ചരിത്രമുണ്ടെന്നും അധികൃതര് കണ്ടെത്തി. നിയമലംഘനങ്ങള് കണ്ടെത്തിയതിനുശേഷം നടത്തിയ വിപുലമായ അന്വേഷണങ്ങളുടെ ഫലമായാണ് അറസ്റ്റുകള് നടന്നതെന്ന് ഷാര്ജ പോലീസ് പറഞ്ഞു.
റോഡ് ഉപയോക്താക്കളുടെ ജീവന് അപകടത്തിലാക്കുന്ന ഏതൊരു പെരുമാറ്റത്തോടും വിട്ടുവീഴ്ചയില്ലാത്ത നയം ഷാര്ജ പോലീസ് ആവര്ത്തിച്ചു. അശ്രദ്ധമായി വാഹനമോടിക്കുന്നവര്ക്കും അപകടകരമായ ഗതാഗത നിയമലംഘനങ്ങള് പ്രോത്സാഹിപ്പിക്കാനും മഹത്വപ്പെടുത്താനും സോഷ്യല് മീഡിയ പ്ലാറ്റ്ഫോമുകള് ഉപയോഗിക്കുന്നവര്ക്കുമെതിരെ കര്ശനമായ നിയമനടപടി സ്വീകരിക്കുമെന്ന് ഷാര്ജ പോലീസ് മുന്നറിയിപ്പ് നല്കി. വാഹന ഉടമകള് ഗതാഗത നിയമങ്ങളും ചട്ടങ്ങളും പാലിക്കണമെന്നും റോഡ് സുരക്ഷയെ എല്ലാത്തിനുമുപരിയായി കാണണമെന്നും പോലീസ് അഭ്യര്ഥിച്ചു. അപകടകരമായ ഡ്രൈവിംഗ് സംഭവങ്ങളും ജീവനും സ്വത്തിനും അപകടമുണ്ടാക്കുന്ന മറ്റ് രീതികളും റിപ്പോര്ട്ട് ചെയ്യാന് പോലീസ് പൊതുജനങ്ങളോട് ആവശ്യപ്പെട്ടു. റോഡ് സുരക്ഷ ശക്തിപ്പെടുത്തുന്നതിലും റോഡ് ഉപയോക്താക്കളുടെ സംരക്ഷണം ഉറപ്പാക്കുന്നതിലും സാമൂഹിക സഹകരണം അനിവാര്യമാണെന്ന് ഷാര്ജ പോലീസ് പറഞ്ഞു.