മക്ക: ഈ വർഷത്തെ ഹജ്ജ് സീസണിൽ ഇന്ത്യൻ തീർത്ഥാടകർക്ക് തുണയായി മക്ക ഇന്ത്യൻ വെൽഫെയർ അസോസിയേഷൻ (ഐവ) മാതൃകാപരമായ സേവന പ്രവർത്തനങ്ങൾ കാഴ്ചവെച്ചു. കഴിഞ്ഞ ഏതാനും വർഷങ്ങളായി ഹജ്ജ് വേളയിൽ സജീവമായുള്ള ഐവയുടെ സന്നദ്ധ സേവനം ഇത്തവണയും പതിനായിരക്കണക്കിന് ഹാജിമാർക്കാണ് വലിയ ആശ്വാസമായത്.
ഇന്ത്യൻ കോൺസുലേറ്റിന്റെയും ഹജ്ജ് മിഷന്റെയും പൂർണ്ണ പിന്തുണയോടെയാണ് സംഘടനയുടെ പ്രവർത്തനങ്ങൾ ഏകോപിപ്പിച്ചത്. പ്രായമായവർക്കും ശാരീരിക അസ്വാസ്ഥ്യങ്ങൾ അനുഭവിക്കുന്നവർക്കുമായി മക്കയിലും അസീസിയയിലുമായി ഇരുപത്തിനാല് മണിക്കൂറും കർമ്മനിരതരായ അൻപതോളം വളണ്ടിയർമാരാണ് ഇത്തവണ രംഗത്തുണ്ടായിരുന്നത്.
വഴിതെറ്റുന്ന തീർത്ഥാടകർക്ക് വഴികാട്ടിയും, ശാരീരിക ബുദ്ധിമുട്ടുള്ളവർക്ക് വീൽചെയർ ഉൾപ്പെടെയുള്ള യാത്രാസൗകര്യങ്ങൾ ഒരുക്കിയും ഹറം പരിസരത്ത് വളണ്ടിയർമാർ വിശ്രമമില്ലാതെ പ്രവർത്തിച്ചു. ഏറ്റവും കൂടുതൽ സഹായം ആവശ്യമുള്ള ഹജ്ജ് ദിനങ്ങളിൽ മിന, അറഫ, മുസ്ദലിഫ എന്നിവിടങ്ങളിലും ഇവരുടെ സേവനം ലഭ്യമായിരുന്നു. ഇതിനുപുറമെ തീർത്ഥാടകർക്കായി ദിവസേന ശരാശരി 900 പാക്കറ്റ് സൗജന്യ ഭക്ഷണം, കുടിവെള്ളം, കുട, ചെരിപ്പ്, പഴങ്ങൾ എന്നിവയും ഐവ പ്രവർത്തകർ വിതരണം ചെയ്തു.
ഹജ്ജ് സർവീസുകൾ മികച്ച രീതിയിൽ ഏകോപിപ്പിക്കുന്നതിന് പൂർണ്ണ പിന്തുണ നൽകിയ ഇന്ത്യൻ കോൺസൽ ജനറൽ, ഹജ്ജ് കോൺസൽ, മറ്റ് കോൺസുലേറ്റ് ഉദ്യോഗസ്ഥർ എന്നിവർക്ക് ഐവ ഭാരവാഹികൾ നന്ദി അറിയിച്ചു. ഹാരിസ് കണ്ണിപൊയിൽ, അബൂബക്കർ, ഷഹീൻ, ഫവാസ്, അസ്കർ മംഗലാപുരം, ബൈജു ഹനീഫ തുടങ്ങിയവരുടെ നേതൃത്വത്തിലാണ് മക്ക ഐവയുടെ വളണ്ടിയർ സംഘം ഈ വർഷത്തെ ഹജ്ജ് സേവന പ്രവർത്തനങ്ങൾ വിജയകരമായി പൂർത്തിയാക്കിയത്.