സന്ആ– യെമനില് വധശിക്ഷക്ക് വിധിക്കപ്പെട്ട തടവുകാരന് 27 വര്ഷത്തെ ജയില്വാസത്തിന് ശേഷം ശിക്ഷ നടപ്പാക്കുന്നതിന് തൊട്ടുമുമ്പ് മാപ്പ് ലഭിച്ചു. ശിക്ഷ നടപ്പാക്കുന്നതിന് നിമിഷങ്ങള്ക്ക് മുമ്പാണ് യെമനി തടവുകാരന് മുഹമ്മദ് താഹിര് സമൂമിന് കൊല്ലപ്പെട്ടയാളുടെ കുടുംബത്തില് നിന്ന് അപ്രതീക്ഷിതമായി മാപ്പ് ലഭിച്ചത്. ഇബ്ബ് ഗവര്ണറേറ്റിലെ സെന്ട്രല് ജയിലില് ഏതു ദിവസവും വധശിക്ഷ നടപ്പാക്കുന്നതും കാത്ത് കഴിഞ്ഞ സമൂമിന്റെ 27 വര്ഷത്തെ ദുരിതത്തിന് ഇതോടെ അന്ത്യമായി. പ്രായപൂര്ത്തിയാകാത്തപ്പോള് കൊലപാതകം നടത്തിയതിനാണ് മുഹമ്മദ് സമൂമിന് കോടതി വധശിക്ഷ വിധിച്ചത്. ഇബ്ബ് ഗവര്ണറേറ്റിലെ സെന്ട്രല് ജയിലിന്റെ മുറ്റത്ത് വ്യാഴാഴ്ച വധശിക്ഷ നടപ്പാക്കുന്നതിന് നിമിഷങ്ങള്ക്ക് മുമ്പ്, കൊല്ലപ്പെട്ട അമ്മാര് അഹ്മദ് അല്ഹുജൈലിയുടെ പിതാവ് ശൈഖ് അഹ്മദ് അല്ഹുജൈലി പ്രതി മുഹമ്മദ് താഹിര് സമൂമിന് മാപ്പ് പ്രഖ്യാപിക്കുകയായിരുന്നു.
ശിക്ഷക്ക് തൊട്ടുമുമ്പ്, ശൈഖ് അഹ്മദ് അല്ഹുജൈലിയുടെ മകന് പിതാവിന്റെ മുമ്പില് മുട്ടുകുത്തി സമൂമിന് മാപ്പ് അപേക്ഷിക്കുകയായിരുന്നെന്ന് ദൃക്സാക്ഷികള് പറഞ്ഞു. ഇതോടെ ശൈഖ് അഹ്മദ് അല്ഹുജൈലി തന്റെ മകന്റെ ഘാതകന് മാപ്പ് പ്രഖ്യാപിക്കുകയായിരുന്നു. പ്രതിക്ക് മാപ്പ് ലഭ്യമാക്കാന് ശിക്ഷ നടപ്പാക്കുന്നതിന് തൊട്ടുമുമ്പു വരെ നടത്തിയ മധ്യസ്ഥ ശ്രമങ്ങളെല്ലാം പരാജയപ്പെട്ടിരുന്നു.
1999 ല് തന്റെ സുഹൃത്ത് അമ്മാറിനെ കൊലപ്പെടുത്തിയ കേസിലാണ് 40 വയസ്സുള്ള മുഹമ്മദ് സമൂം അറസ്റ്റിലായത്. സംഭവം നടക്കുമ്പോള് മുഹമ്മദ് സമൂമിന് 13 വയസ്സ് ആയിരുന്നു പ്രായം. വിചാരണയുടെ എല്ലാ ഘട്ടങ്ങളും തീര്ന്നതിന് ശേഷം 2010 ല് അദ്ദേഹത്തിന് അന്തിമമായി വധശിക്ഷ വിധിച്ചു. മനുഷ്യാവകാശ സംഘടനകളുടെ ഇടപെടലിനെ തുടര്ന്ന് വധശിക്ഷ നടപ്പാക്കുന്നത് നിര്ത്തിവെച്ചു. നേരത്തെ ജയിലിലെ ആരാച്ചാര് അസുഖം വാദിച്ച് സമൂമിന്റെ വധശിക്ഷ നടപ്പാക്കാന് വിസമ്മതിച്ചിരുന്നു. 18 വയസ്സിന് താഴെയുള്ള പ്രായപൂര്ത്തിയാകാത്ത സമയത്താണ് കൊലപാതകം നടത്തിയത് എന്നതിനാല് വധശിക്ഷ നടപ്പാക്കുന്നത് മനഃപൂര്വ്വം ഒഴിവാക്കാനാണ് അസുഖമാണെന്ന് താന് വാദിച്ചതെന്ന് ആരാച്ചാര് പിന്നീട് വെളിപ്പെടുത്തി.
മുഹമ്മദ് സമൂമിന് മാപ്പ് പ്രഖ്യാപിക്കുന്നതിന്റെ ദൃശ്യങ്ങള് രേഖപ്പെടുത്തുന്ന വീഡിയോകള് യെമനിലെ സോഷ്യല് മീഡിയ പ്ലാറ്റ്ഫോമുകളില് നിറഞ്ഞു. വധശിക്ഷ നടപ്പാക്കുന്നത് കാത്ത് ദീര്ഘകാലമായി ജയിലില് കഴിഞ്ഞുവന്നതും, ശിക്ഷ നടപ്പാക്കിയ ശേഷം ജയിലിനുള്ളില് തന്നെ അടക്കം ചെയ്യണമെന്ന് ആവശ്യപ്പെട്ടുള്ള മുഹമ്മദ് സമൂമിന്റെ ഹൃദയഭേദകമായ വില്പത്രവും ഈ കേസിന് കൂടുതല് പൊതുജനശ്രദ്ധ നേടിക്കൊടുത്തു. തന്റെ സുഹൃത്ത് അമ്മാറിനെ അബദ്ധത്തില് കൊലപ്പെടുത്തിയതിന് 27 വര്ഷം ജയിലില് കഴിഞ്ഞ മുഹമ്മദ് സമൂമിനെ മോചിപ്പിക്കാനുള്ള നടപടിക്രമങ്ങള് നിലവില് പുരോഗമിക്കുകയാണെന്ന് മനുഷ്യാവകാശ വൃത്തങ്ങള് റിപ്പോര്ട്ട് ചെയ്തു.