ന്യൂയോർക്ക്: അമേരിക്കൻ പ്രസിഡന്റ് ഡോണൾഡ് ട്രംപിനെ പ്രസിഡന്റ് സ്ഥാനത്ത്നിന്ന് നീക്കണമെന്ന് ടെക് ശതകോടീശ്വരനായ എലോൺ മസ്ക്. ട്രംപിനെ ഇംപീച്ച് ചെയ്യാനുള്ള ആഹ്വാനത്തെ മസ്ക് പിന്തുണച്ചു. താൻ പിന്തുണച്ചിരുന്നില്ലെങ്കിൽ ട്രംപ് പ്രസിഡന്റ് പദവിയിൽ എത്തുമായിരുന്നില്ലെന്നും മസ്ക് പറഞ്ഞു. “പ്രസിഡന്റ് vs എലോൺ. ആരാണ് വിജയിക്കുന്നത്? പണം എലോണിന്റെ പക്കലുണ്ട്. ട്രംപിനെ ഇംപീച്ച് ചെയ്യണം, ട്രംപിന് പകരം ജെഡി വാന്‍സിനെ പ്രസിഡന്റായി നിയമിക്കണം- മലേഷ്യ ആസ്ഥാനമായുള്ള വലതുപക്ഷ എഴുത്തുകാരനായ ഇയാൻ മൈൽസ് ചിയോങ്, മസ്‌കിന്റെ സോഷ്യൽ പ്ലാറ്റ്‌ഫോം എക്‌സിൽ വ്യാഴാഴ്ച ഉച്ചകഴിഞ്ഞുള്ള ഒരു പോസ്റ്റിൽ പറഞ്ഞു.
“അതെ,” എന്നായിരുന്നു ഏകദേശം 20 മിനിറ്റിനുശേഷം ചിയോങ്ങിന്റെ പോസ്റ്റിന് മറുപടിയായി മസ്ക് പറഞ്ഞത്.
2024 നവംബറിലെ പ്രസിഡന്റിന്റെ തിരഞ്ഞെടുപ്പ് വിജയത്തിന് പിന്നിൽ താനാണെന്ന് സോഷ്യൽ മീഡിയയിൽ മസ്ക് അവകാശപ്പെട്ടു. ശിക്ഷിക്കപ്പെട്ട ലൈംഗിക കുറ്റവാളിയും ധനകാര്യ വിദഗ്ദ്ധനുമായ ജെഫ്രി എപ്‌സ്റ്റീനുമായി ട്രംപിന് ബന്ധമുണ്ടെന്നും മസ്ക് ആരോപിച്ചു.
“ശരിക്കും വലിയ ബോംബ് ഇടേണ്ട സമയമായി,” എക്‌സ് പോസ്റ്റിൽ മസ്ക് പറഞ്ഞു. “[ട്രംപ്] എപ്‌സ്റ്റീൻ ഫയലുകളിൽ ഉണ്ട്. അവ പരസ്യമാക്കാത്തതിന്റെ യഥാർത്ഥ കാരണം അതാണ്.” “ഈ പോസ്റ്റ് ഭാവിയിലേക്ക് അടയാളപ്പെടുത്തുക. സത്യം പുറത്തുവരും,” മസ്ക് തുടർന്നുള്ള പോസ്റ്റിൽ പറഞ്ഞു.