തെല്‍അവീവ് – ഇറാന്‍ മിസൈല്‍ ആക്രമണങ്ങളെ നേരിടാനുള്ള ഇസ്രായിലിന്റെ അയണ്‍ ഡോം മിസൈലുകള്‍ പത്തു ദിവസത്തിനകം തീര്‍ന്നുപോകുമെന്ന് വാഷിംഗ്ടണ്‍ പോസ്റ്റ് വെളിപ്പെടുത്തി. അമേരിക്കയുടെ സഹായമില്ലാതെ ഇസ്രായിലിന് ഇറാന്‍ ആക്രമണങ്ങളെ പത്തു ദിവസത്തില്‍ കൂടുതല്‍ കാലം നേരിടാന്‍ കഴിയില്ല. അമേരിക്കന്‍ സഹായമില്ലാതെ ഇസ്രായിലി വ്യോമ പ്രതിരോധത്തിന് ഇറാന്‍ ആക്രമണങ്ങളെ നേരിടാന്‍ 10 ദിവസം കൂടി മാത്രമേ കഴിയൂ എന്ന് പത്രം പറഞ്ഞു.
ഇറാന്‍ നിലവിലെ ആക്രമണ തോത് തുടര്‍ന്നാല്‍, അമേരിക്കയില്‍ നിന്ന് തങ്ങളുടെ ആയുധ ശേഖരം നികത്താതെ ഇസ്രായിലിന് 10 മുതല്‍ 12 ദിവസം വരെ മിസൈല്‍ പ്രതിരോധം നിലനിര്‍ത്താന്‍ കഴിയുമെന്ന് പത്രം സൂചിപ്പിച്ചു. പ്രതിരോധ ആയുധങ്ങള്‍ വീണ്ടും നികത്തേണ്ടതിന്റെ ആവശ്യകത കാരണം വാരാന്ത്യത്തോടെ ഇസ്രായിലി പ്രതിരോധ സംവിധാനങ്ങള്‍ക്ക് മിസൈലുകളുടെ ഒരു ചെറിയ ഭാഗം മാത്രമേ തടയാന്‍ കഴിയുകയുള്ളൂവെന്നും വാഷിംഗ്ടണ്‍ പോസ്റ്റ് പറഞ്ഞു.
ആരോ ഇന്റര്‍സെപ്റ്റര്‍ മിസൈലുകളുടെ കുറവ് ഇറാനില്‍ നിന്നുള്ള ദീര്‍ഘദൂര ബാലിസ്റ്റിക് മിസൈലുകള്‍ക്കെതിരായ ഇസ്രായിലിന്റെ പ്രതിരോധ ശേഷിയെ പ്രതികൂലമായി ബാധിക്കുമെന്ന് അമേരിക്കന്‍ ഉദ്യോഗസ്ഥന്‍ വാള്‍ സ്ട്രീറ്റ് ജേണലിനോട് പറഞ്ഞു.