ഗാസ – ഇരുപത്തിനാലു മണിക്കൂറിനിടെ ഇസ്രായില്‍ ആക്രമണങ്ങളില്‍ ഗാസയില്‍ 97 പേര്‍ കൊല്ലപ്പെടുകയും 440 പേര്‍ക്ക് പരിക്കേല്‍ക്കുകയും ചെയ്തതായി ഗാസ ആരോഗ്യ മന്ത്രാലയം അറിയിച്ചു. ഇന്നു പുലര്‍ച്ചെ മുതല്‍ നിരവധി വ്യോമാക്രമണങ്ങളുണ്ടായി. ആക്രമണങ്ങളില്‍ നിരവധി പേര്‍ കൊല്ലപ്പെട്ടു. ഗാസയിലെ ഖാന്‍ യൂനിസില്‍ പലായനം ചെയ്തവരെ പാര്‍പ്പിച്ച സ്‌കൂളിന് നേരെ ഇസ്രായില്‍ സൈന്യം നടത്തിയ ഡ്രോണ്‍ ആക്രമണത്തില്‍ പത്തു ഫലസ്തീനികള്‍ കൊല്ലപ്പെട്ടതായി ഫലസ്തീന്‍ വാര്‍ത്താ ഏജന്‍സി റിപ്പോര്‍ട്ട് ചെയ്തു.
തെക്കന്‍ ഗാസ മുനമ്പിലെ ഖാന്‍ യൂനിസിന് തെക്ക് ഭാഗത്തുള്ള ഖൈസാന്‍ അല്‍നജ്ജാര്‍ പ്രദേശത്ത് സാധാരണക്കാരുടെ വീടുകള്‍ക്ക് നേരെ ഇസ്രായിലി സൈനിക ടാങ്കുകള്‍ വെടിയുതിര്‍ത്തു. ഗാസ നഗരത്തിലെ വടക്കുകിഴക്കന്‍ പ്രദേശങ്ങളിലും ഇസ്രായില്‍ സൈന്യം വ്യോമാക്രമണം നടത്തി.
മരിച്ചവരില്‍ എട്ടു വയസുകാരിയായ മയാര്‍ അബൂഔദയും ഉള്‍പ്പെടുന്നു. മധ്യ ഗാസയിലെ ദെയ്ര്‍ അല്‍ബലഹിലുള്ള അല്‍അഖ്സ മാര്‍ട്ടിയേഴ്സ് ആശുപത്രിയിലെ അഡ്മിനിസ്‌ട്രേറ്റീവ് കെട്ടിടത്തിന്റെ മേല്‍ക്കൂര ലക്ഷ്യമിട്ട് ഇസ്രായില്‍ ബോംബാക്രമണം നടത്തിയതായി ഗാസ ആരോഗ്യ മന്ത്രാലയം റിപ്പോര്‍ട്ട് ചെയ്തു. ആരോഗ്യ സംവിധാനം ദുര്‍ബലപ്പെടുത്താനുള്ള വ്യവസ്ഥാപിത നയം ഇസ്രായില്‍ തുടരുന്നു. അല്‍പ സമയം മുമ്പ് അല്‍അഖ്സ മാര്‍ട്ടിയേഴ്സ് ആശുപത്രിയിലെ അഡ്മിനിസ്‌ട്രേറ്റീവ് കെട്ടിടത്തിന്റെ മേല്‍ക്കൂര ലക്ഷ്യമിട്ട് ഇസ്രായില്‍ ആക്രമണം നടത്തി. ഇത് മെഡിക്കല്‍ ജീവനക്കാര്‍, രോഗികള്‍, പരിക്കേറ്റവര്‍, അവരുടെ കൂട്ടാളികള്‍ എന്നിവര്‍ക്കിടയില്‍ ഭയവും ആശയക്കുഴപ്പവും സൃഷ്ടിച്ചതായി ആരോഗ്യ മന്ത്രാലയം പറഞ്ഞു. ഇസ്രായില്‍ ആക്രമണങ്ങളെ ആരോഗ്യ മന്ത്രാലയം അപലപിച്ചു. ഗാസയില്‍ ആരോഗ്യ സ്ഥാപനങ്ങളുടെ സംരക്ഷണത്തിനും, ആരോഗ്യ സംവിധാനത്തെ തുടര്‍ച്ചയായി ദുര്‍ബലപ്പെടുത്തുന്നതും ലക്ഷ്യമിടുന്നതും കുറ്റകരമാക്കാനും അന്താരാഷ്ട്ര സമൂഹം സത്വര നടപടികള്‍ സ്വീകരിക്കണമെന്ന് ഗാസ ആരോഗ്യ മന്ത്രാലയം ആവശ്യപ്പെട്ടു.
2023 ഒക്‌ടോബര്‍ ഏഴു മുതല്‍ ഗാസയില്‍ ഇസ്രായില്‍ സേന അഴിച്ചുവിട്ട ആക്രമണത്തില്‍ ഇതുവരെ 54,510 ഫലസ്തീനികള്‍ കൊല്ലപ്പെടുകയും 1,24,901 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. നിരവധി പേര്‍ ഇപ്പോഴും അവശിഷ്ടങ്ങള്‍ക്കിടയിലും തെരുവുകളിലും കുടുങ്ങിക്കിടക്കുകയാണ്. ആംബുലന്‍സുകള്‍ക്കും രക്ഷാപ്രവര്‍ത്തകര്‍ക്കും അവരിലേക്ക് എത്താന്‍ കഴിയുന്നില്ല.