വാഷിംഗ്ടൺ– ഇസ്രായിലും ഹിസ്ബുല്ലയും തമ്മിൽ ആഴ്ചകളായി തുടരുന്ന രൂക്ഷമായ പോരാട്ടത്തിന് അറുതി വരുത്താൻ ലക്ഷ്യമിട്ടുള്ള നിർണ്ണായക ചർച്ചകൾ അടുത്തയാഴ്ച വാഷിംഗ്ടണിൽ നടക്കും. യു.എസ് പ്രസിഡന്റ് ഡൊണാൾഡ് ട്രംപിന്റെ മധ്യസ്ഥതയിൽ നടക്കുന്ന കൂടിക്കാഴ്ചയിൽ ഇസ്രായിലിലെയും ലെബനോനിലെയും ഉന്നത ഉദ്യോഗസ്ഥർ പങ്കെടുക്കുമെന്ന് പ്രതീക്ഷിക്കുന്നു. മേഖലയിലെ സംഘർഷം ശാന്തമാക്കുന്നതിനായി ഇരുവിഭാഗത്തിനും മേൽ ശക്തമായ സമ്മർദ്ദമാണ് ട്രംപ് ചെലുത്തുന്നത്.
ലെബനോനുമായി ചർച്ചകൾ ആരംഭിക്കുമെന്ന് ഇസ്രായിൽ പ്രധാനമന്ത്രി ബെഞ്ചമിൻ നെതന്യാഹു ഇന്നലെ പ്രഖ്യാപിച്ചു. ഹിസ്ബുല്ലയെ നിരായുധീകരിക്കുക, ഇരുരാജ്യങ്ങളും തമ്മിൽ സുസ്ഥിരമായ സമാധാന കരാറിലെത്തുക എന്നീ ലക്ഷ്യങ്ങളാണ് ചർച്ചയുടെ അജണ്ടയിലുള്ളതെന്ന് അദ്ദേഹം വിശദീകരിച്ചു. എന്നാൽ, സമാധാന ചർച്ചകൾ പുരോഗമിക്കുന്ന പക്ഷം ലെബനോനിലെ തങ്ങളുടെ സ്ഥാനങ്ങളിൽ നിന്ന് സൈന്യത്തെ പിൻവലിക്കാനോ നിലവിലെ കര ഓപ്പറേഷനുകൾ കുറയ്ക്കാനോ തയ്യാറാണോ എന്ന കാര്യത്തിൽ ഇസ്രായിൽ ഇതുവരെ വ്യക്തമായ നിലപാട് അറിയിച്ചിട്ടില്ല.
അതേസമയം, ലെബനോനിലെ ഹിസ്ബുല്ലക്കെതിരായ ആക്രമണം അവസാനിപ്പിക്കുക എന്നത് വരാനിരിക്കുന്ന ചർച്ചകളിൽ ഇറാന്റെ പ്രധാന ആവശ്യമാണ്. ശനിയാഴ്ച പാകിസ്ഥാനിൽ നടക്കാനിരിക്കുന്ന ചർച്ചകളിൽ ഇറാൻ ഈ വിഷയം ഉന്നയിക്കും. 2022-ൽ അമേരിക്കയുടെ മധ്യസ്ഥതയിൽ നടന്ന ചർച്ചകളിലൂടെ ഇരുരാജ്യങ്ങളും സമുദ്ര അതിർത്തി നിർണ്ണയിക്കുന്നതിൽ ധാരണയിലെത്തിയിരുന്നു. ഇതിന് തുടർച്ചയായി, 2024-ലെ യുദ്ധം അവസാനിപ്പിക്കുക എന്ന ലക്ഷ്യത്തോടെ 2025 ഡിസംബറിൽ തെക്കൻ ലെബനോനിലെ നാഖൂറയിൽ പരോക്ഷ ചർച്ചകളും നടന്നിരുന്നു.