ജിദ്ദ – അധിനിവിഷ്ട വെസ്റ്റ് ബാങ്കിൽ ഇസ്രായേൽ പരമാധികാരം അടിച്ചേൽപ്പിക്കണമെന്ന് ആവശ്യപ്പെട്ട് ഇസ്രായേൽ പാർലമെന്റായ നെസെറ്റ് പാസാക്കിയ പ്രമേയം അറബ്, ഇസ്‌ലാമിക രാജ്യങ്ങളുടെയും സംഘടനകളുടെയും ശക്തമായ പ്രതിഷേധത്തിന് കാരണമായി. ഈ നടപടി ദുരന്തകരമായ ഏറ്റുമുട്ടലുകൾക്ക് വഴിവെക്കുമെന്ന് അറബ് ലീഗ് സെക്രട്ടറി ജനറൽ അഹ്മദ് അബുൽഗെയ്ത് മുന്നറിയിപ്പ് നൽകി.
സൗദി അറേബ്യ, ബഹ്‌റൈൻ, ഈജിപ്ത്, ഇന്തോനേഷ്യ, ജോർദാൻ, നൈജീരിയ, ഫലസ്തീൻ, ഖത്തർ, തുർക്കി, യു.എ.ഇ., അറബ് ലീഗ്, ഓർഗനൈസേഷൻ ഓഫ് ഇസ്‌ലാമിക് കോ-ഓപ്പറേഷൻ എന്നിവ സംയുക്ത പ്രസ്താവനയിലൂടെ ഇസ്രായേലിന്റെ തീരുമാനത്തെ ശക്തമായി അപലപിച്ചു. ഈ നടപടി അന്താരാഷ്ട്ര നിയമങ്ങളുടെയും യു.എൻ. രക്ഷാസമിതി പ്രമേയങ്ങളായ 242 (1967), 338 (1973), 2334 (2016) എന്നിവയുടെയും നഗ്നമായ ലംഘനമാണെന്ന് പ്രസ്താവനയിൽ വ്യക്തമാക്കി. 1967 മുതൽ കൈവശപ്പെടുത്തിയ ഫലസ്തീൻ പ്രദേശങ്ങളിലെ ജൂത കുടിയേറ്റ പ്രവർത്തനങ്ങൾ ഉൾപ്പെടെയുള്ള അധിനിവേശ നടപടികളെ നിയമവിധേയമാക്കാനുള്ള ശ്രമങ്ങൾ യു.എൻ. പ്രമേയങ്ങൾ അസാധുവാക്കുന്നു.
അധിനിവിഷ്ട ഫലസ്തീൻ പ്രദേശങ്ങളിൽ ഇസ്രായേലിന് പരമാധികാരമില്ലെന്നും ഏകപക്ഷീയമായ നടപടികൾക്ക് നിയമപരമായ സാധുതയില്ലെന്നും പ്രസ്താവന വ്യക്തമാക്കി. ഈ നീക്കം കിഴക്കൻ ജറൂസലം ഉൾപ്പെടെയുള്ള ഫലസ്തീൻ പ്രദേശങ്ങളുടെ നിയമപരമായ പദവി മാറ്റാനുള്ള ശ്രമമാണ്, എന്നാൽ ഇത് അന്താരാഷ്ട്ര നിയമപ്രകാരം അസാധുവാണ്.
ഇസ്രായേലിന്റെ നടപടികൾ മേഖലയിൽ പിരിമുറുക്കം വർധിപ്പിക്കുമെന്നും ഗാസയിലെ മാനുഷിക ദുരന്തത്തെ കൂടുതൽ രൂക്ഷമാക്കുമെന്നും അറബ് ലീഗ് മുന്നറിയിപ്പ് നൽകി. യു.എൻ. രക്ഷാസമിതിയും അന്താരാഷ്ട്ര സമൂഹവും നിയമപരവും ധാർമികവുമായ ഉത്തരവാദിത്തങ്ങൾ ഏറ്റെടുത്ത്, ഇസ്രായേലിന്റെ നിയമവിരുദ്ധ നയങ്ങൾ അവസാനിപ്പിക്കാൻ അടിയന്തര നടപടികൾ സ്വീകരിക്കണമെന്ന് ആവശ്യപ്പെട്ടു. 1967 ജൂൺ 4-ലെ അതിർത്തിയിൽ കിഴക്കൻ ജറൂസലം തലസ്ഥാനമായി സ്വതന്ത്ര ഫലസ്തീൻ രാഷ്ട്രം സ്ഥാപിക്കാനുള്ള പ്രതിബദ്ധത പത്ത് രാജ്യങ്ങളും രണ്ട് സംഘടനകളും ആവർത്തിച്ചു.
അഹ്മദ് അബുൽഗെയ്ത് നെസെറ്റിന്റെ വോട്ടെടുപ്പിനെ ശക്തമായി വിമർശിച്ചു. “അധിനിവേശം നിലനിർത്താനും ഫലസ്തീൻ പ്രദേശങ്ങൾ ഇസ്രായേലിൽ കൂട്ടിച്ചേർക്കാനുമുള്ള തുടർച്ചയായ ശ്രമങ്ങളുടെ ഭാഗമാണ് ഈ നീക്കം. വെസ്റ്റ് ബാങ്കും കിഴക്കൻ ജറൂസലവും അന്താരാഷ്ട്ര നിയമപ്രകാരം അധിനിവിഷ്ട പ്രദേശങ്ങളാണ്, ഇത് യു.എൻ. അംഗീകരിച്ചിട്ടുണ്ട്,” അദ്ദേഹം പറഞ്ഞു.
നിയമവിരുദ്ധവും ധാർമികമായി നിന്ദ്യവുമായ ഈ നടപടികൾക്കെതിരെ ശക്തമായ നിലപാട് സ്വീകരിക്കാൻ അന്താരാഷ്ട്ര സമൂഹത്തോട് അറബ് ലീഗ് ആഹ്വാനം ചെയ്തു. ഇസ്രായേലിനുള്ളിലെ തീവ്രവാദ കുടിയേറ്റ, മത പ്രസ്ഥാനങ്ങളെ നേരിടേണ്ടതിന്റെ ആവശ്യകതയും അവർ ഊന്നിപ്പറഞ്ഞു. ഇല്ലെങ്കിൽ, മേഖല മുഴുവൻ വിനാശകരമായ മതപരമായ ഏറ്റുമുട്ടലുകളിലേക്ക് നീങ്ങുമെന്ന് അവർ മുന്നറിയിപ്പ് നൽകി.
സൗദി അറേബ്യയും ഇസ്രായേലിന്റെ നീക്കത്തെ ശക്തമായി അപലപിച്ചു. “ഇത് അന്താരാഷ്ട്ര നിയമങ്ങളുടെയും യു.എൻ. പ്രമേയങ്ങളുടെയും നഗ്നമായ ലംഘനമാണ്. ദ്വിരാഷ്ട്ര പരിഹാരത്തിനുള്ള ശ്രമങ്ങളെ ഇത് ദുർബലപ്പെടുത്തുന്നു,” സൗദി വിദേശ മന്ത്രാലയം പ്രസ്താവനയിൽ വ്യക്തമാക്കി. ഫലസ്തീൻ ജനതയുടെ സ്വയംനിർണയാവകാശം ഉൾപ്പെടെയുള്ള അവകാശങ്ങൾ പൂർണമായി പിന്തുണക്കുന്നതായും 1967-ലെ അതിർത്തിയിൽ ജറൂസലം തലസ്ഥാനമായി സ്വതന്ത്ര ഫലസ്തീൻ രാഷ്ട്രം സ്ഥാപിക്കാൻ അന്താരാഷ്ട്ര സമൂഹം ഗൗരവമായ നടപടികൾ സ്വീകരിക്കണമെന്നും സൗദി ആവശ്യപ്പെട്ടു.