തെല്‍അവീവ് – കഴിഞ്ഞ വെള്ളിയാഴ്ച മുതല്‍ ഇറാന്‍ നടത്തിയ മിസൈല്‍ ആക്രമണങ്ങളില്‍ ഇസ്രായിലില്‍ കൊല്ലപ്പെട്ടവരുടെ എണ്ണം 24 ആയി ഉയര്‍ന്നതായി ഇസ്രായില്‍ പ്രധാനമന്ത്രിയുടെ ഓഫീസ് അറിയിച്ചു. ഞായറാഴ്ച അര്‍ധരാത്രി മുതല്‍ 11 പേര്‍ കൂടി ഇസ്രായിലില്‍ കൊല്ലപ്പെട്ടു. തെല്‍അവീവിനടുത്തുള്ള പെറ്റാ ടിക്വയില്‍ നാലു പേരും വടക്ക് ഹൈഫായില്‍ മൂന്നു പേരും തെല്‍അവീവിന്റെ പ്രാന്തപ്രദേശമായ ബ്‌നെയ് ബ്രാക്കില്‍ ഒരാളും കൊല്ലപ്പെട്ടു. കഴിഞ്ഞ ദിവസം ബാറ്റ് യാമിലുണ്ടായ ആക്രമണത്തില്‍ കൊല്ലെപ്പട്ട രണ്ടു പേരുടെ മൃതദേഹങ്ങള്‍ അവശിഷ്ടങ്ങള്‍ക്കടിയില്‍ നിന്ന് പുറത്തെടുത്തു. പ്രത്യേകം നിര്‍ണയിക്കാത്ത സ്ഥലത്ത് മറ്റൊരാളും കൊല്ലപ്പെട്ടു.
ഇറാന്റെ പക്കല്‍ ഇപ്പോഴും ആയിരക്കണക്കിന് ബാലിസ്റ്റിക് മിസൈലുകളുള്ളതായി ഇസ്രായില്‍ ദേശീയ സുരക്ഷാ ഉപദേഷ്ടാവ് സാച്ചി ഹനെഗ്ബി പറഞ്ഞു. ഇത് മുമ്പ് കണക്കാക്കിയതിനേക്കാള്‍ കൂടുതലാണ്. ഇത് ദീര്‍ഘകാലാടിസ്ഥാനത്തില്‍ ഇറാന്‍ ഭീഷണി അവസാനിപ്പിക്കാന്‍ കഴിയുന്ന യുദ്ധമല്ലെന്ന് ഹനെഗ്ബി ഇസ്രായില്‍ ആര്‍മി റേഡിയോയോട് പറഞ്ഞു. ഇറാനുമായുള്ള യുദ്ധത്തില്‍ തങ്ങളുടെ ലക്ഷ്യങ്ങള്‍ നേടിയെടുക്കാന്‍ ഇസ്രായിലിന് അമേരിക്കയുടെ ആവശ്യമില്ല. ഇറാന്റെ ഫോര്‍ഡോ ആണവ കേന്ദ്രത്തെ സ്വന്തമായി കൈകാര്യം ചെയ്യാന്‍ ഇസ്രായിലിന് കഴിയും.
ഇറാന്‍ ഭരണകൂട നേതാക്കളെ ലക്ഷ്യമിട്ട് ആക്രമണങ്ങള്‍ നടത്താന്‍ ഇസ്രായില്‍ നിലവില്‍ പദ്ധതിയിടുന്നില്ല. ഇവര്‍ ഇസ്രായിലിന്റെ ലക്ഷ്യങ്ങളില്‍ ഉള്‍പ്പെടുന്നില്ലെന്നും സാച്ചി ഹനെഗ്ബി പറഞ്ഞു. ഇറാന്റെ കൈവശം 1,500 മുതല്‍ 2,000 വരെ മിസൈലുകള്‍ ഉണ്ടെന്നാണ് സൈനിക വിശകലന വിദഗ്ധര്‍ ഇതുവരെ വിശ്വസിച്ചിരുന്നത്. ഇറാന്‍ ഇതിനകം നൂറുകണക്കിന് മിസൈലുകള്‍ വിക്ഷേപിച്ചു. ചില മിസൈലുകല്‍ ഇസ്രായില്‍ ആക്രമിച്ച് നശിപ്പിച്ചതായും കരുതപ്പെടുന്നു. ഇറാനെതിരായ സൈനിക നടപടി ആഴ്ചകളോളം നീണ്ടുനില്‍ക്കുമെന്ന് ഇസ്രായില്‍ പറഞ്ഞു.