ജിദ്ദ– ഇറാന് യുദ്ധത്തിന്റെ ആഘാതം മൂലം വിതരണങ്ങള് തടസ്സപ്പെട്ടതോടെ ഇന്ന് എണ്ണവില കുതിച്ചുയര്ന്നു. നിര്ണായകമായ ഹുര്മുസ് കടലിടുക്ക് ഇറാന് അടച്ചുപൂട്ടി. ഊര്ജ അടിസ്ഥാന സൗകര്യങ്ങള് തകര്ന്നു. അന്താരാഷ്ട്ര മാനദണ്ഡമായ ബ്രെന്റ് ക്രൂഡ് ഓയില് വില ബാരലിന് 8 ശതമാനത്തിലധികം ഉയര്ന്ന് 85.12 ഡോളറിലെത്തി. 2024 ജൂലൈക്ക് ശേഷമുള്ള ഏറ്റവും ഉയര്ന്ന നിലയാണിതെന്ന് എ.എഫ്.പി റിപ്പോര്ട്ട് ചെയ്യുന്നു. യുഎസിന്റെ പ്രധാന എണ്ണ കരാറായ വെസ്റ്റ് ടെക്സസ് ഇന്റര്മീഡിയറ്റ് ബാരലിന് 7 ശതമാനത്തിലധികം ഉയര്ന്ന് 76.47 ഡോളറിലെത്തി.
ഹുര്മുസ് കടലിടുക്ക് പൂര്ണ്ണമായും അടച്ചുപൂട്ടുകയും അതിന്റെ ഫലമായി വിതരണം 20 ശതമാനം കുറയുകയും ചെയ്താല് എണ്ണവില ബാരലിന് 100 ഡോളര് കവിയുമെന്ന് കൊമേഴ്സ് ബാങ്ക് പറഞ്ഞു. നീണ്ടുനില്ക്കുന്ന സംഘര്ഷം വിതരണ പ്രശ്നങ്ങള്ക്കും അലൂമിനിയം ഉല്പ്പാദന തടസ്സങ്ങള്ക്കും വില പ്രത്യാഘാതങ്ങള്ക്കും കാരണമാകുമെന്ന് ബാങ്ക് കൂട്ടിച്ചേര്ത്തു.