‘നന്മയുടെ പക്ഷികൾ’; ​ഗാസയ്ക്ക് സഹായവുമായി വീണ്ടും യുഎഇ വിമാനങ്ങൾ

ദുബൈ– ഗാസയിലെ ദുരിതത്തിലാഴ്ന്ന ജനങ്ങൾക്കായി വീണ്ടും യുഎഇയുടെ സഹായഹസ്തം.​ഗാസയുടെ ആകാശങ്ങളിൽ ആവശ്യ വസ്തുക്കളുമായി യുഎഇ വിമാനങ്ങളെത്തി. മരുന്നും, ഭക്ഷണവുമുൾപ്പെടെയുള്ള ദുരിതാശ്വാസ സാമ​ഗ്രികളാണ് എയർഡ്രോപ്പ് വഴി ​ഗാസയിലേക്കെത്തിച്ചത്.

എയർഡ്രോപ്പിങ്ങിനു പുറമെ 40 ട്രക്കുകളിലായി ആവശ്യവസ്തുക്കളും ​ഗാസയിലേക്കെത്തിച്ചിട്ടുണ്ട്. നന്മയുടെ പക്ഷികൾ എന്ന് പേരിട്ട ദൗത്യത്തിൻ്റെ ഭാഗമായാണ് യുഎഇ സഹായമെത്തിച്ചത്. കരമാർഗം തടസ്സപ്പെടുന്ന മേഖലകളിലേക്കാണ് പ്രധാനമായും വിമാനങ്ങളിലൂടെ സഹായങ്ങൾ എത്തിച്ചുക്കൊണ്ടിരിക്കുന്നത്.

ജോർദാൻ, ഫ്രാൻസ്, ജർമനി, ബെൽജിയം, കാനഡ എന്നിവയുടെ സഹകരണത്തോടെയാണ് ഈ അന്താരാഷ്ട്ര ദൗത്യപരിപാടി മുന്നോട്ടുപോയത്.ഇതുവരെ 69 വിമാനമിഷനുകൾ വഴി ആകെ 3,829 ടൺ ദുരിതാശ്വാസ സാമഗ്രികൾ ഗസ്സയിലേക്ക് അയച്ചതായി യുഎഇ അധികൃതർ അറിയിച്ചു.