മാഡ്രിഡ്: സ്പാനിഷ് ലീഗിലെ റയല്‍ മാഡ്രിഡിനായുള്ള അരങ്ങേറ്റ മല്‍സരത്തില്‍ ഫ്രഞ്ച് സൂപ്പര്‍ സ്റ്റാര്‍ കിലിയന്‍ എംബാപ്പെയ്ക്ക് സമനില കൊണ്ട് തൃപ്തിപ്പെടേണ്ടി വന്നു. മയ്യോക്കെയ്‌ക്കെതിരേയുള്ള മല്‍സരം 1-1നാണ് അവസാനിച്ചത്. മല്‍സരത്തില്‍ റയലാണ് ലീഡെടുത്തത്. 13ാം മിനിറ്റില്‍ വിനീഷ്യസ് ജൂനിയര്‍-റൊഡ്രിഗോ കൂട്ടുകെട്ടില്‍ പിറന്നതായിരിന്നു ലീഡ് ഗോള്‍. റൊഡ്രിഗോ ആണ് സ്‌കോര്‍ ചെയ്തത്. രണ്ടാം പകുതിയിലാണ് മയ്യോക്ക സമനില ഗോള്‍ നേടിയത്.53ാം മിനിറ്റില്‍ മുറിഖി ആണ് സമനില ഗോള്‍ നേടിയത്. പുതിയ സൈനിങ് എംബാപ്പെയ്ക്ക് ലാ ലിഗയിലെ തന്റെ ആദ്യ മല്‍സരത്തില്‍ റയലിനായി സ്‌കോര്‍ ചെയ്യാനായില്ല.
മയ്യോക്കയുടെ ഹോം ഗ്രൗണ്ടില്‍ നിന്നായിരുന്നു മല്‍സരം. ആദ്യ പകുതിയുടെ തുടക്കത്തില്‍ ആധിപത്യം കണ്ടെങ്കിലും റയലിന്റെ അറ്റാക്കിങ് ശൈലി ഇന്ന് പുറത്ത് വന്നില്ല. ഗോള്‍ വീണതിന് ശേഷം റയല്‍ പിന്നോട്ട് പോവുകയായിരുന്നു.പിന്നീട് മയ്യോക്കയാണ് അവസരങ്ങള്‍ സൃഷ്ടിച്ചത്. ഇഞ്ചുറി ടൈമില്‍ മെന്‍ഡി ചുവപ്പ് കാര്‍ഡ് കണ്ടിരുന്നു.