മയാമി: ഇന്റര്‍മിയാമിയുടെ പുതിയ പരിശീലകനായി ഹാവിയര്‍ മഷ്‌രാനോ എത്തുന്നു. അര്‍ജന്റീനയിലും ബാഴ്സലോണയിലും മെസ്സിയുടെ സഹകളിക്കാരനായിരുന്നു മഷരാനോ. അര്‍ജന്റീനയുടെ അണ്ടര്‍ 20 ദേശീയ ടീമിന്റെ പരിശീലക സ്ഥാനമൊഴിഞ്ഞാകും മെസ്സിയുടെ ടീമായ ഇന്റര്‍ മിയാമിയെ പരിശീലിക്കാന്‍ മഷരാനോ എത്തുക. 2023 അണ്ടര്‍ 20 ലോകകപ്പിലും 2024 ഒളിംപിക്‌സിലും അര്‍ജന്റീന ടീമിനെ പരിശീലിപ്പിച്ചിട്ടുണ്ട്.മിയാമിയുമായി 2028 വരെയുള്ള ദീര്‍ഘകാല കരാറിലാവും മഷരാനോ ഒപ്പ് വെയ്ക്കുക എന്നാണ് റിപ്പോര്‍ട്ടുകള്‍.
കഴിഞ്ഞ ദിവസം ഇന്റര്‍ മിയാമിയുടെ നിലവിലെ പരിശീലകനായ ജെറാര്‍ഡോ ടാറ്റ മാര്‍ട്ടിനോ ക്ലബ്ബ് വിട്ടിരുന്നു. വ്യക്തിപരമായ കാരണങ്ങളാലാണ് ടാറ്റ മാര്‍ട്ടിനോ ക്ലബ് വിടുന്നതെന്നായിരുന്നു മേജര്‍ ലീഗ് സോക്കര്‍ ക്ലബ്ബ് വിശദീകരണം നല്‍കിയത്. 2023 ല്‍ ക്ലബിന്റെ പരിശീലകനായ ടാറ്റ മാര്‍ട്ടിനോയും മുമ്പ് ബാഴ്സലോണയില്‍ മെസ്സിക്കൊപ്പം പ്രവര്‍ത്തിച്ചിട്ടുണ്ട്.
ഇന്റര്‍മിയാമിക്ക് ലീഗ്സ് കപ്പ്, സപ്പോട്ടേഴ്‌സ് ഷീല്‍ഡ് കപ്പ് തുടങ്ങി നിരവധി കപ്പുകള്‍ നേടി കൊടുത്ത ടാറ്റ മാര്‍ട്ടിന 2025 ഫിഫ ക്ലബ് ലോകകപ്പ് യോഗ്യതയും ക്ലബ്ബിന് നേടിക്കൊടുത്തു. എന്നാല്‍ ഈ സീസണില്‍ എം എല്‍ എസ് കപ്പില്‍ ടീം അപ്രതീക്ഷിതമായി പ്ലേ ഓഫില്‍ നിന്ന് തന്നെ പുറത്തായിരുന്നു.