സീറ്റിൽ: ഫിഫ ലോകകപ്പ് ഗ്രൂപ്പ് ജിയിലെ നിർണായക പോരാട്ടങ്ങൾ പൂർത്തിയായപ്പോൾ ബെൽജിയവും ഈജിപ്തും അടുത്ത റൗണ്ടിലേക്ക് യോഗ്യത നേടി. എന്നാൽ അവസാന നിമിഷം വരെ ആവേശം നിറഞ്ഞ മത്സരത്തിൽ നിർഭാഗ്യം വില്ലനായതോടെ ഇറാന് സമനിലകൊണ്ട് തൃപ്തിപ്പെടേണ്ടി വന്നു. ഇറാൻ സമനില വഴങ്ങിയതോടെ മികച്ച മൂന്നാം സ്ഥാനക്കാരുടെ പട്ടികയിൽ ഇടംപിടിച്ച് സെനഗൽ റൗണ്ട് ഓഫ് 32 ഉറപ്പിച്ചു കഴിഞ്ഞു.
നാടകീയ നിമിഷങ്ങൾ; ഇറാന്റെ നെഞ്ച് തകർത്ത് വാറും ബാറും
സീറ്റിൽ സ്റ്റേഡിയത്തിൽ നടന്ന ഈജിപ്തിനെതിരായ മത്സരത്തിൽ 1-1 എന്ന നിലയിലാണ് ഇറാൻ സമനില വഴങ്ങിയത്. മത്സരത്തിന്റെ 5-ാം മിനിറ്റിൽ മഹ്മൂദ് സാബറിലൂടെ ഈജിപ്ത് മുന്നിലെത്തിയെങ്കിലും, 14-ാം മിനിറ്റിൽ റാമിൻ റെസായീൻ ഇറാന് സമനില സമ്മാനിച്ചു. മത്സരത്തിന്റെ 11-ാം മിനിറ്റിൽ മെഹ്ദി താരെമിക്ക് ലഭിച്ച പെനാൽറ്റി നഷ്ടപ്പെടുത്തിയത് ഇറാന് വലിയ തിരിച്ചടിയായി മാറിയിരുന്നു.
മത്സരത്തിന്റെ ഇൻജുറി ടൈമിൽ (90+3′) ഈജിപ്ഷ്യൻ പ്രതിരോധത്തിന് പന്ത് ക്ലിയർ ചെയ്യാൻ സാധിക്കാതെ വന്നതോടെ ബോക്സിനുള്ളിൽ ഉണ്ടായ ആശയക്കുഴപ്പത്തിനൊടുവിൽ ബാക്ക് പോസ്റ്റിൽ നിന്നിരുന്ന ഷൊജായി ഖലീൽസാദെ പന്ത് വലയിലേക്ക് അടിച്ചുകയറ്റുകയായിരുന്നു. തങ്ങൾ വിജയം ഉറപ്പിച്ചു എന്ന ആവേശത്തിൽ അതിരുവിട്ട ആഘോഷപ്രകടനങ്ങൾ നടത്തിയതിന് ഖലീൽസാദെയ്ക്ക് തൊട്ടടുത്ത മിനിറ്റിൽ മഞ്ഞക്കാർഡും ലഭിച്ചു. എന്നാൽ ഇറാന്റെ ഈ സന്തോഷത്തിന് നിമിഷങ്ങളുടെ ആയുസ്സ് മാത്രമേ ഉണ്ടായിരുന്നുള്ളൂ. ‘വാർ’ (VAR) പരിശോധനയിൽ ഖലീൽസാദെ അവസാന പ്രതിരോധക്കാരനേക്കാൾ മുന്നിലായിരുന്നു എന്ന് കണ്ടെത്തുകയും ഓഫ്സൈഡ് വിധിച്ചുകൊണ്ട് ആ ഗോൾ നിഷേധിക്കുകയുമായിരുന്നു. ഇറാന്റെ ഹൃദയം തകർത്ത ഈ തീരുമാനത്തിന് തൊട്ടുപിന്നാലെ ഇറാൻ താരം സഈദ് ഇസതോലാഹിക്ക് ലഭിച്ച സുവർണ്ണാവസരം ഗോൾപോസ്റ്റിന്റെ ബാറിൽ തട്ടി തകർന്നതോടെ ഇറാന്റെ വിജയപ്രതീക്ഷകൾ പൂർണ്ണമായും അവസാനിച്ചു.
ന്യൂസിലൻഡിനെ തകർത്തുതരിപ്പണമാക്കി ബെൽജിയം
വാൻകൂവറിലെ ബിസി പ്ലേസ് സ്റ്റേഡിത്തിൽ നടന്ന ഗ്രൂപ്പിലെ മറ്റൊരു മത്സരത്തിൽ ഒന്നിനെതിരെ അഞ്ച് ഗോളുകൾക്ക് ന്യൂസിലൻഡിനെ തകർത്തെറിഞ്ഞാണ് ബെൽജിയം ഗ്രൂപ്പ് ചാമ്പ്യന്മാരായി അടുത്ത റൗണ്ടിലേക്ക് മുന്നേറിയത്. ബെൽജിയത്തിനായി ലിയാൻഡ്രോ ട്രൊസാർഡ് ഇരട്ട ഗോളുകൾ നേടിയപ്പോൾ കെവിൻ ഡി ബ്രൂയ്നെ, റൊമേലു ലുക്കാക്കു, അലക്സിസ് സെയ്ലെമേക്കേഴ്സ് എന്നിവരും ലക്ഷ്യം കണ്ടു. എലിജ ജസ്റ്റാണ് ന്യൂസിലൻഡിന്റെ ആശ്വാസ ഗോൾ നേടിയത്.