മാഡ്രിഡ്: സ്പാനിഷ് ലീഗില്‍ പുതിയ സീസണിലെ ആദ്യ ജയവുമായി റയല്‍ മാഡ്രിഡ്. റയല്‍ വലാഡോളിഡിനെതിരേ മൂന്ന് ഗോളിന്റെ ജയമാണ് റയല്‍ നേടിയത്. ലീഗിലെ ആദ്യ മല്‍സരത്തില്‍ റയല്‍ മയ്യോര്‍ക്കയോട് സമനില വഴങ്ങിയിരുന്നു. റയലിന്റെ ഹോം ഗ്രൗണ്ടിലെ സീസണിലെ ആദ്യ മല്‍സരമായിരുന്നു. സൂപ്പര്‍ താരം കിലിയന്‍ എംബാപ്പെ, എന്‍ഡ്രിക്ക് എന്നിവരുടെ സാന്റിയാഗോ ബെര്‍ണാബ്യൂവിലെ ആദ്യ മല്‍സരമാണ്. എന്നാല്‍ എംബാപ്പെയ്ക്ക് സ്‌കോര്‍ ചെയ്യാനായില്ല.
താരത്തിന്റെ ലാ ലിഗയിലെ ആദ്യ ഗോളിനായി ഇനിയും കാത്തിരിക്കണം. 10 ഓളം അവസരങ്ങള്‍ സൃഷ്ടിച്ചെങ്കിലും താരത്തിന് വലാഡോളിന്റെ വലകുലുക്കാനായില്ല. സൂപ്പര്‍ ടീനേജ് താരം എന്‍ഡ്രിക്ക് ഇഞ്ചുറി ടൈമില്‍ റയലിനായി തന്റെ ആദ്യ ഗോള്‍ സ്‌കോര്‍ ചെയ്തു. സ്‌കോര്‍ ചെയ്തു. വാല്‍വര്‍ഡേ(50), ബ്രാഹിം ഡയസ് (88) എന്നിവരാണ് റയലിന്റെ മറ്റ് സ്‌കോറര്‍മാര്‍. ആദ്യ പകുതിയില്‍ റയലിനെ ഗോള്‍രഹിതമായി പിടിച്ചുകെട്ടാന്‍ വലാഡോളിഡിനായിരുന്നു. റൊഡ്രിഗോ, എഡര്‍ മിലിറ്റാവോ, ബ്രാഹിം ഡയസ്സ് എന്നിവര്‍ ഗോളുകള്‍ക്ക് അസിസ്റ്റ് ഒരുക്കി.
ഇംഗ്ലിഷ് പ്രീമിയര്‍ ലീഗില്‍ വോള്‍വ്‌സിനെതിരേ ചെല്‍സി വമ്പന്‍ ജയം സ്വന്തമാക്കി. 6-2നാണ് ചെല്‍സിയുടെ ജയം. നോനി മദുവെകെ ചെല്‍സിയ്ക്ക് വേണ്ടി ഹാട്രിക്ക് നേടി. പിഎസ് വി ഐന്തോവനില്‍ നിന്നും പുതിയ സീസണില്‍ ചെല്‍സി സൈന്‍ ചെയ്ത താരമാണ് മദുവെകെ.താരത്തിന് പുറമെ നിക്കോളാസ് ജാക്‌സന്‍ (2), കോള്‍ പാല്‍മര്‍ (45), പകരക്കാരനായി ഇറങ്ങിയ ജാവോ ഫെലിക്‌സ് (80) എന്നിവരും ലക്ഷ്യകണ്ടു.
മറ്റൊരു മല്‍സരത്തില്‍ ബ്രന്റ്‌ഫോഡിനെതിരേ ലിവര്‍പൂള്‍ എതിരില്ലാത്ത രണ്ട് ഗോളിന്റെ ജയം നേടി.ലിവര്‍പൂളിനായി ലൂയിസ് ഡയസ്സും മുഹമ്മദ് സലാഹും സ്‌കോര്‍ ചെയ്തു. ന്യൂകാസില്‍ യുനൈറ്റഡിനെ എഎഫ്‌സി ബേണ്‍മൗത്ത് സമനിലയില്‍ പിടിച്ചു.