തബ്ലിസി: യൂറോ കപ്പിലെ അട്ടിമറി വീരന്‍മാരായി പ്രീക്വാര്‍ട്ടറിലെത്തിയ ജോര്‍ജ്ജിയക്ക് യുവേഫാ നേഷന്‍സ് ലീഗില്‍ മിന്നും ജയം. കരുത്തരും ലോകറാങ്കിങില്‍ 42ാം സ്ഥാനത്തുമുള്ള ചെക്ക് റിപ്പബ്ലിക്കിനെ 4-1നാണ് ജോര്‍ജ്ജിയ തകര്‍ത്തത്. റാങ്കിങില്‍ 70ാം സ്ഥാനത്തുള്ള ജോര്‍ജ്ജിയ ഇക്കഴിഞ്ഞ യൂറോകപ്പില്‍ ചെക്ക് റിപ്പബ്ലിക്കിനെ സമനിലയില്‍ കുരുക്കുകയും പോര്‍ച്ചുഗലിനെ അട്ടിമറിക്കുകയും ചെയ്തിരുന്നു. ക്വാറത്സ്ഖേലിയ (33), ക്വെറ്റാഡ്‌സെ (53), മികൗതാഡ്‌സെ (63),
കൊച്ചോരാഷ്വിലി (66) എന്നിവരാണ് ജോര്‍ജ്ജിയ്ക്കായി വലകുലിക്കിയത്.
ഇതേ ഗ്രൂപ്പില്‍ നടന്ന മറ്റൊരു മല്‍സരത്തില്‍ അല്‍ബേനിയ ഉക്രെയ്‌നെ പരാജയപ്പെടുത്തി. 2-1നാണ് അല്‍ബേനിയയുടെ ജയം. ഗ്രൂപ്പ് രണ്ടില്‍ നടന്ന മല്‍സരത്തില്‍ ഇംഗ്ലണ്ട് റിപ്പബ്ലിക്ക് ഓഫ് അയര്‍ലന്റിനെ എതിരില്ലാത്ത രണ്ട് ഗോളിന് പരാജയപ്പെടുത്തി. ഗ്രീലിഷും ഡക്ലന്‍ റൈസുമാണ് ഇംഗ്ലണ്ടിനായി സ്‌കോര്‍ ചെയ്തത്. മറ്റ് മല്‍സരങ്ങളില്‍ ഫിന്‍ലന്റിനെതിരേ ഗ്രീസും ഹംഗറിക്കെതിരേ ജര്‍മ്മനിയും ജയിച്ചു.അഞ്ച് ഗോളിനാണ് ജര്‍മ്മനിയുടെ ജയം. നെതര്‍ലന്റസ് 5-2ന് ബോസ്‌നിയയെ പരാജയപ്പെടുത്തി.
ഇന്ന് നടക്കുന്ന മല്‍സരങ്ങളില്‍ പോര്‍ച്ചുഗല്‍ സ്‌കോട്ട്‌ലന്റിനെയും ക്രൊയേഷ്യ പോളണ്ടിനെയും ഡെന്‍മാര്‍ക്ക് സെര്‍ബിയയെയും സ്‌പെയിന്‍ സ്വിറ്റ്‌സര്‍ലന്റിനെയും നേരിടും.