മാഡ്രിഡ്: യുവേഫാ ചാംപ്യന്‍സ് ലീഗില്‍ റയല്‍ മാഡ്രിഡിന് ഷോക്ക്. ഫ്രഞ്ച് ലീഗ് വണ്‍ പ്രമുഖരായ ലില്ലെയോട് എതിരില്ലാത്ത ഒരു ഗോളിനാണ് റയലിന്റെ തോല്‍വി. ജൊനാഥന്‍ ഡേവിഡ് 47ാം മിനിറ്റിലാണ് ലില്ലെയുടെ വിജയഗോള്‍ നേടിയത്. 2023 മെയ്യ് മാസത്തിലാണ് അവസാനമായി റയല്‍ ചാംപ്യന്‍സ് ലീഗില്‍ തോല്‍വി രുചിച്ചത്. ചാംപ്യന്‍സ് ലീഗിലെ റയലിന്റെ അപരാജിത 14 മല്‍സരങ്ങളുടെ കുതിപ്പാണ് ലില്ലെ അവസാനിപ്പിച്ചത്. മറ്റ് മല്‍സരങ്ങളിലെ 36 വിജയങ്ങളുടെ കുതിപ്പിനുമാണ് ലില്ലെ ബ്ലോക്കിട്ടത്.
മികച്ച കളി പുറത്തെടുത്തെങ്കിലും ഫിനിഷിങിലെ പോരായ്മ റയലിന് തിരിച്ചടിയാവുകയായിരുന്നു.സൂപ്പര്‍ താരം കിലിയന്‍ എംബാപ്പെ, വിനീഷ്യസ് ജൂനിയര്‍, റൊഡ്രിഗോ എന്നിവര്‍ക്കൊന്നും വേണ്ടത്ര മികവ് പ്രകടിപ്പിക്കാനായില്ല.മറ്റൊരു മല്‍സരത്തില്‍ യുവന്റസ് ആര്‍ ബി ലെപ്‌സിഗിനെ 3-2ന് പരാജയപ്പെടുത്തി. മൊണാക്കോ-ഡൈനാമോ സെഗരിബ് മല്‍സരം 2-2 സമനിലയില്‍ കലാശിച്ചു.ശക്തര്‍ ഡൊണറ്റ്‌സ്‌കിനെ എതിരില്ലാത്ത മൂന്ന് ഗോളിന് അറ്റ്‌ലാന്റ പരാജയപ്പെടുത്തി. ജിറോണയെ ഫെയനൂര്‍ദ് 3-2നും വീഴ്ത്തി.
മറ്റൊരു മല്‍സരത്തില്‍ ബയേണ്‍ മ്യുണിക്കിനെ ആസ്റ്റണ്‍ വില്ല എതിരില്ലാത്ത ഒരു ഗോളിന് അട്ടിമറിച്ചു. 79ാം മിനിറ്റില്‍ ഡുറാന്‍ ആണ് ഇംഗ്ലിഷ് ക്ലബ്ബിന് വേണ്ടി വിജയഗോള്‍ നേടിയത്.