ക്യാംപ് നൗ: യുവേഫാ ചാംപ്യന്‍സ് ലീഗില്‍ യങ് ബോയിസിനെതിരേ അഞ്ച് ഗോളിന്റെ ജയവുമായി ബാഴ്‌സലോണ. മല്‍സരത്തില്‍ റോബര്‍ട്ടോ ലെവന്‍ഡോസ്‌കി ഇരട്ട ഗോള്‍ നേടി, റഫീനാ, ഇനാഗോ മാര്‍ട്ടിന്‍സ് എന്നിവരാണ് സ്വിസ് ക്ലബ്ബിനെതിരായി സ്‌കോര്‍ ചെയ്ത മറ്റു താരങ്ങള്‍. ഒരു ഗോള്‍ സെല്‍ഫ് ഗോളായിരുന്നു. പെഡ്രി, റഫീനാ, മാര്‍ട്ടിന്‍സ് എന്നിവര്‍ ഗോളുകള്‍ക്ക് വഴിയൊരുക്കി. സ്‌കോട്ടിഷ് ക്ലബ്ബ് സെല്‍റ്റിക്കിനെതിരായ മല്‍സരത്തില്‍ ജര്‍മ്മന്‍ ക്ലബ്ബ് ബോറൂസിയാ ഡോര്‍ട്ട്മുണ്ടിന് വമ്പന്‍ ജയം.
7-1നാണ് ബോറൂസിയയുടെ ജയം. സെര്‍ബിയന്‍ ക്ലബ്ബ് റെഡ് സ്റ്റാര്‍ ബെല്‍ഗ്രേഡിനെതിരായ മല്‍സരത്തില്‍ ഇറ്റാലിയന്‍ ചാംപ്യന്‍മാരായ ഇന്റര്‍മിലാന്‍ എതിരില്ലാത്ത നാല് ഗോളിന് ജയിച്ചു.
സ്ലൊവാക്കിയന്‍ ക്ലബ്ബ് സ്ലോവന്‍ ബ്രാറ്റിസ്ലവയ്‌ക്കെതിരേ മാഞ്ചസ്റ്റര്‍ സിറ്റി നാല് ഗോളിന്റെ ജയം നേടി. ഗുണ്‍ഡോങ്, ഫോഡന്‍, ഹാലന്റ്, മാക്റ്റീ എന്നിവര്‍ സിറ്റിയ്ക്കായി സ്‌കോര്‍ ചെയ്തു.
ഇറ്റാലിയന്‍ ശക്തരായ എസി മിലാന്‍ ജര്‍മ്മന്‍ ക്ലബ്ബ് ബയേണ്‍ ലെവര്‍കൂസനോട് എതിരില്ലാത്ത ഒരു ഗോളിന് വീണു.