ദാക്കാ– 2026 ടി20 ലോകകപ്പിൽ നിന്ന് പിന്മാറാനുള്ള ബംഗ്ലാദേശ് ക്രിക്കറ്റ് ബോർഡിന്റെ (ബിസിബി) തീരുമാനം രാജ്യത്തെ കായിക മേഖലയെ കടുത്ത സാമ്പത്തിക തകർച്ചയിലേക്ക് നയിക്കുന്നു. സുരക്ഷാ കാരണങ്ങൾ മുൻനിർത്തി ഇന്ത്യയിൽ കളിക്കില്ലെന്ന പിടിവാശി തുടരുന്നത് വഴി ബംഗ്ലാദേശ് ക്രിക്കറ്റിന്റെ ആകെ വാർഷിക വരുമാനത്തിന്റെ 60 ശതമാനത്തിലധികം നഷ്ടപ്പെടുമെന്നാണ് പുതിയ റിപ്പോർട്ടുകൾ വ്യക്തമാക്കുന്നത്. സർക്കാർ കായിക ഉപദേശകൻ ആസിഫ് നസ്റുൽ ഉന്നയിച്ച സുരക്ഷാ ആശങ്കകളെത്തുടർന്നാണ് ലോകവേദിയിൽ നിന്നുള്ള ഈ നാടകീയമായ പിന്മാറ്റം.
ഐസിസിയിൽ നിന്ന് വർഷാവർഷം ലഭിക്കേണ്ട ഗ്രാന്റിൽ മാത്രം ഏകദേശം 27 മില്യൺ ഡോളറിന്റെ (ഏകദേശം 325 കോടി ടാക്ക) കുറവാണ് ബംഗ്ലാദേശിന് ഉണ്ടാകാൻ പോകുന്നത്. ഇതിനുപുറമെ, ലോകകപ്പ് മത്സരങ്ങളുടെ സംപ്രേക്ഷണാവകാശത്തിലൂടെയും വൻകിട സ്പോൺസർഷിപ്പുകളിലൂടെയും ലഭിക്കേണ്ട കോടിക്കണക്കിന് രൂപയും ഇതോടെ ഇല്ലാതാകും. അമിനുൽ ഇസ്ലാം ബുൾബുളിന്റെ നേതൃത്വത്തിലുള്ള ക്രിക്കറ്റ് ബോർഡിന്റെ ചരിത്രത്തിൽ ഇതാദ്യമായാണ് രാഷ്ട്രീയ കാരണങ്ങളാൽ ഒരു ഐസിസി ടൂർണമെന്റ് തന്നെ വേണ്ടെന്ന് വെക്കുന്നത്.
കൊൽക്കത്തയിലും മുംബൈയിലുമായി നിശ്ചയിച്ചിരുന്ന തങ്ങളുടെ മത്സരങ്ങൾ ശ്രീലങ്കയിലേക്ക് മാറ്റണമെന്ന ബംഗ്ലാദേശിന്റെ ആവശ്യം ഐസിസി തള്ളിയതാണ് നിലവിലെ തർക്കങ്ങൾക്ക് ആധാരം. ഇന്ത്യയിൽ കളിക്കുന്നതിനെതിരെയുള്ള പ്രാദേശികമായ പൊതുവികാരം കണക്കിലെടുത്ത് ദേശീയ അന്തസ്സിനാണ് തങ്ങൾ മുൻഗണന നൽകുന്നതെന്ന് ആസിഫ് നസ്റുൽ പ്രതികരിച്ചു. പിന്മാറ്റം വഴി മത്സരങ്ങൾ നഷ്ടമായാലും താരങ്ങൾക്ക് ലഭിക്കേണ്ട മാച്ച് ഫീ ബോർഡ് നൽകുമെന്ന് ഉറപ്പുനൽകിയിട്ടുണ്ടെങ്കിലും, ലോകോത്തര താരങ്ങളുമായി ഏറ്റുമുട്ടാനുള്ള വലിയൊരു അവസരമാണ് ബംഗ്ലാദേശിലെ യുവതാരങ്ങൾക്ക് ഇതോടെ നഷ്ടമാകുന്നത്.
ഈ പിന്മാറ്റം ലോകകപ്പിൽ മാത്രം ഒതുങ്ങിനിൽക്കില്ല എന്നതാണ് വസ്തുത. വരാനിരിക്കുന്ന ഇന്ത്യയുടെ ബംഗ്ലാദേശ് പര്യടനത്തെയും ഈ തീരുമാനം അവതാളത്തിലാക്കും. പത്ത് സാധാരണ ഉഭയകക്ഷി പരമ്പരകളിൽ നിന്ന് ലഭിക്കുന്നതിന് തുല്യമായ ടെലിവിഷൻ വരുമാനമാണ് ഒരു ഇന്ത്യൻ പര്യടനത്തിലൂടെ മാത്രം ബംഗ്ലാദേശ് ക്രിക്കറ്റ് ബോർഡിന് ലഭിക്കാറുള്ളത്. ഈ വരുമാനം കൂടി നഷ്ടമായാൽ ബംഗ്ലാദേശ് ക്രിക്കറ്റ് ഭരണസംവിധാനത്തിന് നിത്യച്ചെലവുകൾ പോലും കണ്ടെത്താൻ ബുദ്ധിമുട്ടേണ്ടി വരുമെന്നാണ് സാമ്പത്തിക വിദഗ്ധർ വിലയിരുത്തുന്നത്.