കീവ്– റഷ്യ ഇറാന് ഇന്റലിജന്സ് വിവരങ്ങള് കൈമാറുന്നതിന് അനിഷേധ്യമായ തെളിവുകൾ കൈവശമുണ്ടെന്ന് ഉക്രെയ്ൻ പ്രസിഡന്റ് വോളോഡിമർ സെലെൻസ്കി. ഉക്രെയ്ൻ സൈനിക ഇന്റലിജൻസ് സർവീസ് മേധാവിയുമായി നടത്തിയ കൂടിക്കാഴ്ചയ്ക്ക് ശേഷമാണ് അദ്ദേഹം ഇക്കാര്യം വെളിപ്പെടുത്തിയത്. റഷ്യ തങ്ങളുടെ സൈബർ ഇന്റലിജൻസ് ശേഷികളും മിഡിൽ ഈസ്റ്റിലെ പങ്കാളികളിൽ നിന്ന് ലഭിച്ച വിവരങ്ങളും ഇറാനുമായി പങ്കുവെക്കുന്നുണ്ടെന്ന് സെലെൻസ്കി തന്റെ എക്സ് (X) പ്ലാറ്റ്ഫോമിലെ പോസ്റ്റിൽ വ്യക്തമാക്കി.
ഇത്തരത്തിൽ ഇന്റലിജൻസ് വിവരങ്ങൾ കൈമാറുന്നത് ആഗോള സുരക്ഷയെ അട്ടിമറിക്കുന്ന പ്രവർത്തനമാണെന്ന് സെലെൻസ്കി വിമർശിച്ചു. ഇത് മേഖലയിൽ കൂടുതൽ അസ്ഥിരതയ്ക്ക് കാരണമാകുമെന്നും അദ്ദേഹം മുന്നറിയിപ്പ് നൽകി. ലോകമെമ്പാടുമുള്ള സുരക്ഷ ഉറപ്പാക്കാൻ താൽപ്പര്യമുള്ള എല്ലാ രാജ്യങ്ങളും ഈ നീക്കത്തെ തടയാൻ മുന്നോട്ടുവരണമെന്നും അദ്ദേഹം ആവശ്യപ്പെട്ടു.
ഈ സൈനിക സഹകരണം ഇതിനകം തന്നെ ആഗോള വിപണികളെ പ്രതികൂലമായി ബാധിച്ചിട്ടുണ്ടെന്ന് അദ്ദേഹം ചൂണ്ടിക്കാട്ടി. പല രാജ്യങ്ങളിലെയും ഇന്ധന വിതരണത്തെ ഇത് സങ്കീർണ്ണമാക്കുകയാണ്. ഇറാൻ ഭരണകൂടത്തെ നിലനിൽക്കാൻ സഹായിക്കുന്നതിലൂടെയും കൂടുതൽ കൃത്യമായ ആക്രമണങ്ങൾ നടത്താൻ അവർക്ക് കരുത്ത് പകരുന്നതിലൂടെയും റഷ്യ ഫലത്തിൽ യുദ്ധം നീട്ടിക്കൊണ്ടുപോവുകയാണെന്നും സെലെൻസ്കി ആരോപിച്ചു.
അതേസമയം, റഷ്യ ഇറാനുമായി ഉപഗ്രഹ ചിത്രങ്ങളും അത്യാധുനിക ഡ്രോൺ സാങ്കേതികവിദ്യയും പങ്കിടുന്നുണ്ടെന്ന വാൾസ്ട്രീറ്റ് ജേണൽ റിപ്പോർട്ട് കഴിഞ്ഞ ആഴ്ച ക്രെംലിൻ തള്ളിക്കളഞ്ഞിരുന്നു. ഈ റിപ്പോർട്ടുകൾ വെറും വ്യാജവാർത്ത മാത്രമാണെന്നാണ് റഷ്യയുടെ ഔദ്യോഗിക നിലപാട്.