സെൽഫ് ഗോളിൽ തുർക്കി വീണു, സെമിയിൽ ഹോളണ്ട്-ഇംഗ്ലണ്ട് പോരാട്ടം

മ്യൂണിക്- യൂറോ കപ്പ് ഫുട്ബോളിൽ തുർക്കിയെ ഒന്നിനെതിരെ രണ്ടു ഗോളുകൾക്ക് തോൽപ്പിച്ച് നെതർലാന്റ് സെമിയിൽ. ഇംഗ്ലണ്ടുമായാണ് നെതർലാന്റിന്റെ സെമി പോരാട്ടം. ഒരു ഗോളിന് പിറകിൽനിന്ന ശേഷമാണ് ഹോളണ്ട് തിരിച്ചെത്തി വിജയം സ്വന്തമാക്കിയത്.

കളിയുടെ മുപ്പത്തിയഞ്ചാമത്തെ മിനിറ്റിൽ കോർണറിൽനിന്നാണ് തുർക്കി ഗോൾ നേടിയത്. സാമെത് അകയ്ഡിനാണ് ഹെഡറിലൂടെ ഗോൾ നേടിയത്. ആദ്യപകുതി തുർക്കിയുടെ മുന്നേറ്റത്തോടെയാണ് അവസാനിച്ചത്. എന്നാൽ രണ്ടാം പകുതിയിൽ ഹോളണ്ട് തിരിച്ചടിച്ചു. എഴുപതാമത്തെ മിനിറ്റിൽ ഡി വ്രിജ് ഓറഞ്ച് പടയുടെ സമനില ഗോൾ നേടി.

ഡെപേയുടെ പെർഫെക്റ്റ് കോർണറിൽ നിന്നാണ് സ്റ്റെഫാൻ ഡി വ്രിജ് ഡച്ചിന് സമനില നേടിയത്. വ്രിജിന്റെ ആദ്യ രാജ്യാന്തര ഗോളാണിത്. എഴുപത്തിയാറാമത്തെ മിനിറ്റിൽ സെൽഫ് ഗോളിലൂടെ ഹോളണ്ട് വീണ്ടും മുന്നിലെത്തി.