വാഷിംഗ്ടണ് – ഇറാനിൽ തകർന്നുവീണ യുദ്ധവിമാനത്തിലെ യുഎസ് പൈലറ്റിനെ രക്ഷപ്പെടുത്തിയ വിവരം പുറത്തുവിട്ട മാധ്യമപ്രവർത്തകനെ ജയിലിലടക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. രക്ഷാപ്രവർത്തനത്തിന്റെ വിവരം ആദ്യം റിപ്പോർട്ട് ചെയ്ത പത്രപ്രവർത്തകനോട് അതിന്റെ ഉറവിടം വെളിപ്പെടുത്താൻ ആവശ്യപ്പെടുമെന്നും, അതിന് തയ്യാറായില്ലെങ്കിൽ ജയിലിൽ പോകേണ്ടി വരുമെന്നുമാണ് വൈറ്റ് ഹൗസിൽ നടത്തിയ പത്രസമ്മേളനത്തിൽ ട്രംപ് പറഞ്ഞത്. ഇറാനുമായുള്ള യുദ്ധത്തെക്കുറിച്ച് മാധ്യമങ്ങൾ നൽകുന്ന വാർത്തകൾ വളരെയധികം വിപരീതമാണെന്ന് കഴിഞ്ഞ കുറച്ച് ആഴ്ചകളായി ട്രംപ് തന്റെ സഹായികളോട് പരാതിപ്പെട്ടിരുന്നു. ഇതിന്റെ തുടർച്ചയായാണ് മാധ്യമങ്ങൾക്കെതിരായ തന്റെ നിലപാട് അദ്ദേഹം കടുപ്പിച്ചത്.
കഴിഞ്ഞ വെള്ളിയാഴ്ച ഇറാനിൽ യുഎസ് യുദ്ധവിമാനം വെടിവെച്ചിട്ടതിന് പിന്നാലെ, വിമാനത്തിലുണ്ടായിരുന്ന രണ്ട് പൈലറ്റുമാരിൽ ഒരാളെ രക്ഷപ്പെടുത്തിയ വാർത്ത പല മാധ്യമങ്ങളും റിപ്പോർട്ട് ചെയ്തിരുന്നു. ഈ വിവരം ചോർന്നത് രണ്ടാമത്തെ പൈലറ്റിന്റെ രക്ഷാപ്രവർത്തനത്തിന് വലിയ ഭീഷണിയായെന്ന് ട്രംപ് ചൂണ്ടിക്കാട്ടി. എങ്കിലും ആ പൈലറ്റിനെയും ഒടുവിൽ സുരക്ഷിതമായി രക്ഷപ്പെടുത്തിയതായി അദ്ദേഹം അറിയിച്ചു. ആദ്യ പൈലറ്റിനെ രക്ഷപ്പെടുത്തിയ കാര്യം ഒരു മണിക്കൂറോളം ഔദ്യോഗികമായി രഹസ്യമാക്കി വെച്ചിരിക്കുകയായിരുന്നുവെന്നും എന്നാൽ ആരോ അത് ചോർത്തുകയുമായിരുന്നുവെന്നും ട്രംപ് പറഞ്ഞു. വിവരം ചോർത്തിയ ആളെ കണ്ടെത്താൻ തീവ്രശ്രമം നടത്തുകയാണെന്നും ദേശീയ സുരക്ഷാ കാരണങ്ങളാൽ ആ വ്യക്തിയെ കൈമാറാൻ മാധ്യമസ്ഥാപനത്തോട് ആവശ്യപ്പെടുമെന്നും അദ്ദേഹം വ്യക്തമാക്കി. എന്നാൽ ഏത് മാധ്യമപ്രവർത്തകനെക്കുറിച്ചാണ് താൻ പരാമർശിച്ചതെന്ന് ട്രംപ് വെളിപ്പെടുത്തിയിട്ടില്ല.
ന്യൂയോർക്ക് ടൈംസ്, സിബിഎസ് ന്യൂസ്, ആക്സിയോസ് തുടങ്ങിയ പ്രമുഖ മാധ്യമങ്ങളെല്ലാം തന്നെ പൈലറ്റിന്റെ രക്ഷാപ്രവർത്തനത്തെക്കുറിച്ച് റിപ്പോർട്ട് നൽകിയിരുന്നു. ട്രംപിന്റെ പ്രസ്താവനയെക്കുറിച്ച് വൈറ്റ് ഹൗസ് കൂടുതൽ വിശദീകരണങ്ങൾ നൽകാൻ തയ്യാറായിട്ടില്ല. അതേസമയം, വ്യാജ വാർത്തകൾ പ്രചരിപ്പിക്കുന്ന മാധ്യമപ്രവർത്തകർക്ക് തങ്ങളുടെ ലൈസൻസ് പുതുക്കുന്നതിന് മുൻപ് തെറ്റുകൾ തിരുത്താൻ അവസരമുണ്ടെന്ന് ഫെഡറൽ കമ്മ്യൂണിക്കേഷൻസ് കമ്മീഷൻ ചെയർമാൻ ബ്രെൻഡൻ കാർ കഴിഞ്ഞ മാസം പറഞ്ഞിരുന്നു. ചില മാധ്യമങ്ങൾ അമേരിക്ക യുദ്ധം തോൽക്കാനാണ് ആഗ്രഹിക്കുന്നതെന്ന് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലിൽ’ നേരത്തെ കുറിച്ചിരുന്നു.