തിരുവനന്തപുരം–കേരളാ സംസ്ഥാന സര്‍ക്കാരിന്റെ ഗുരുതരമായവീഴ്ചയും അനാവശ്യമായ ദുര്‍വാശിയുമാണ് കേരള എഞ്ചിനിയറിങ് പ്രവേശനം അനിശ്ചിത്വത്തില്‍ ആകാന്‍ ഇടയാക്കിയതെന്ന് കെപിസിസി പ്രസിഡന്റ് സണ്ണി ജോസഫ്. കീം പ്രവേശന വിഷയത്തില്‍ രാഷ്ട്രീയം കലര്‍ത്താനില്ല. പക്ഷെ വിദ്യാര്‍ത്ഥികളുടെ ആശങ്ക പരിഹരിക്കണം. ഉന്നത വിദ്യാഭ്യസ മന്ത്രി ന്യായീകരണവും ദുരഭിമാനവും ഉപേക്ഷിച്ച് യാഥാര്‍ത്ഥ്യം അംഗീകരിക്കാന്‍ തയ്യാറാകണം. വിദ്യാര്‍ത്ഥികള്‍ കിം പ്രവേശന ഫലവുമായി ബന്ധപ്പെട്ട പ്രയാസം അനുഭവിക്കുകയാണ്. കേരളത്തിലെ അനേകം വിദ്യാര്‍ത്ഥികളും രക്ഷകര്‍ത്താക്കളും നേരിടുന്ന പ്രതിസന്ധി മനസ്സിലാക്കണം. സര്‍ക്കാര്‍ ഉത്തരവാദിത്തം ഏറ്റെടുത്ത് ആവശ്യമായ നടപടി അടിയന്തിരമായി സ്വീകരിക്കണം. നിലപാട് സ്വീകരിക്കുന്നതില്‍ മറ്റൊരു ഭരണകക്ഷിയായ സിപിഐ കുറച്ചുകൂടി ധൈര്യം കാണിക്കണം. വിദ്യാര്‍ത്ഥികള്‍ക്കും രക്ഷകര്‍ത്താക്കള്‍ക്കും ഒപ്പമാണ് പ്രതിപക്ഷം. കീം വിഷയത്തില്‍ നിലപാട് തിരുത്താന്‍ സര്‍ക്കാര്‍ തയ്യാറാകണം. ഇപ്പോഴത്തെ പ്രതിസന്ധിക്ക് ഉത്തരവാദി സര്‍ക്കാരാണ് എന്ന കാര്യത്തില്‍ തര്‍ക്കമില്ല. സര്‍ക്കാര്‍ പിടിവാശി ഉപേക്ഷിക്കണം. അവകാശവാദങ്ങള്‍ ഓരോന്നായി പൊളിയുകയാണെന്നും കെപിസിസി അധ്യക്ഷന്‍ വ്യക്തമാക്കി. ഉന്നത വിദ്യാഭ്യാസ മേഖലയുടെയും ആരോഗ്യ മേഖലയുടെയും തകര്‍ച്ച നാം നേരില്‍ കാണുകയാണ്. അനാവശ്യ അവകാശവാദങ്ങളെല്ലാം അടിസ്ഥാനരഹിതമാണെന്ന് പൊതുജനത്തിന് ബോധ്യപ്പെട്ടെന്നും സണ്ണി ജോസഫ് പറഞ്ഞു.
ദേശീയ തലത്തിലും സംസ്ഥാന തലത്തിലും പ്രതിപക്ഷത്തുള്ള സംഘടനയാണ് കോണ്‍ഗ്രസ്. അതുകൊണ്ടുതന്നെ സംഘടനപരമായ ഉത്തരവാദിത്തവും രാഷ്ട്രീയ ദൗത്യവും വലുതാണ്. അതേറ്റെടുത്ത് ഒറ്റക്കെട്ടായി മുന്നോട്ട് പോകാനാണ് കോണ്‍ഗ്രസ് പദ്ധതികള്‍ ആവിഷ്‌കരിച്ചിട്ടുള്ളതെന്നും ചൂണ്ടിക്കാട്ടി. ശശി തരൂരിനെ സംബന്ധിച്ച ചോദ്യത്തിന് തരൂര്‍ കോണ്‍ഗ്രസിന്റെ ഭാഗമാണെന്ന് പറഞ്ഞ സണ്ണി ജോസഫ് ജനാധിപത്യ മതേതര പാര്‍ട്ടിയായ കോണ്‍ഗ്രസിനെ ശക്തിപ്പെടുത്താന്‍ എല്ലാവരും സന്നദ്ധരാണെന്നും എടുത്തു പറഞ്ഞു.