ജിദ്ദ – വിശുദ്ധ ഖുര്‍ആന്‍ കോപ്പി പരസ്യമായി കത്തിച്ച് കുപ്രസിദ്ധനായ ഇറാഖി വംശജനായ അഭയാര്‍ഥി സല്‍വാന്‍ മോമിക സ്വീഡന്റെ തലസ്ഥാനമായ സ്‌റ്റോക്ക്‌ഹോമിന് തെക്ക് സ്വന്തം അപാര്‍ട്ട്‌മെന്റിനകത്തു വെച്ച് വെടിയേറ്റ് മരിച്ചു. അപാര്‍ട്ട്‌മെന്റിനകത്തു വെച്ച് ലൈവ് വീഡിയോ ചെയ്യുന്നതിനിടെയാണ് യുവാവ് കൊല്ലപ്പെട്ടത്.
നിരവധി പേര്‍ സംഭവത്തിന് സാക്ഷികളായി. നാല്‍പതിനടുത്ത് വയസ്സ് പ്രായമുള്ള ഒരാളെ അപ്പാര്‍ട്ട്‌മെന്റില്‍ വെടിയേറ്റ നിലയില്‍ കണ്ടെത്തി ആശുപത്രിയില്‍ പ്രവേശിപ്പിച്ചതായി സ്റ്റോക്ക്ഹോം പോലീസ് മീഡിയ വക്താവ് ഡാനിയേല്‍ വിക്ഡാല്‍ പറഞ്ഞു. സോഡെര്‍ടാല്‍ജെയില്‍ ഒരാള്‍ വെടിയേറ്റ് മരിച്ചതായി പോലീസ് വക്താവ് സ്ഥിരീകരിച്ചു. പക്ഷേ, മറ്റ് വിശദാംശങ്ങള്‍ പോലീസ് നല്‍കിയില്ല. കസ്റ്റഡിയിലെടുത്തവരില്‍ വെടിവെച്ചയാള്‍ ഉള്‍പ്പെട്ടിട്ടുണ്ടോ എന്നും പോലീസ് വ്യക്തമാക്കിയില്ല. 2023 ല്‍ സല്‍വാന്‍ മോമിക സ്വീഡനില്‍ വിശുദ്ധ ഖുര്‍ആന്‍ കോപ്പി കത്തിക്കുകയും ഖുന്‍ആന്‍ കോപ്പിയെ നിന്ദിക്കുകയും ചെയ്യുന്ന വീഡിയോകള്‍ ലോകമെമ്പാടും പ്രചരിച്ചിരുന്നു. നിരവധി ഇസ്‌ലാമിക രാജ്യങ്ങളില്‍ രോഷം ആളിക്കത്തിക്കാന്‍ ഇത് ഇടാക്കുകയും പല സ്ഥലങ്ങളിലും കലാപങ്ങള്‍ക്കും അശാന്തിക്കും കാരണമാവുകയും ചെയ്തിരുന്നു.
കഴിഞ്ഞ ബുധനാഴ്ച രാത്രി സോഡെര്‍ടാല്‍ജെ നഗരത്തിലെ ഹോവ്സ്ജോ ഏരിയയിലെ റെസിഡന്‍ഷ്യല്‍ അപ്പാര്‍ട്ട്മെന്റിനുള്ളിലാണ് സല്‍വാന്‍ മോമിക വെടിയേറ്റ് കൊല്ലപ്പെട്ടതെന്ന് സ്വീഡിഷ് ടെലിവിഷന്‍ എസ്.വി.ടി നൈഹെറ്റര്‍ വെളിപ്പെടുത്തി. ബുധനാഴ്ച രാത്രി പതിനൊന്നു മണിക്കാണ് മോമികക്ക് വെടിയേറ്റതെന്നും റെസിഡന്‍ഷ്യല്‍ കെട്ടിടത്തിനുള്ളില്‍ വെടിവെപ്പ് നടന്നതായി പോലീസിനും മെഡിക്കല്‍ സംഘത്തിനും വിവരം ലഭിക്കുകയായിരുന്നെന്നും ബാഗ്ദാദ് ടുഡേ പോര്‍ട്ടല്‍ റിപ്പോര്‍ട്ട് ചെയ്തു.
സല്‍വാന്‍ മോമികയുടെ കൊലപാതകത്തിന് പിന്നില്‍ വിദേശ ശക്തിയാണെന്ന് സ്വീഡിഷ് പ്രധാനമന്ത്രി ഉള്‍ഫ് ക്രിസ്റ്റേഴ്സണ്‍ പറഞ്ഞു. കൊലപാതകത്തിന് മറ്റൊരു രാജ്യവുമായി ബന്ധമുണ്ടാകാമെന്ന് ആശങ്കയുണ്ടെന്ന് ക്രിസ്റ്റേഴ്സണ്‍ മാധ്യമപ്രവര്‍ത്തകരോട് പറഞ്ഞു. ഒരു വിദേശ ശക്തിയുമായി ബന്ധമുണ്ടെന്ന് വ്യക്തമായതിനാല്‍ സുരക്ഷാ വകുപ്പുകള്‍ ആഴത്തില്‍ അന്വേഷണം നടത്തുന്നതായി പ്രധാനമന്ത്രി പറഞ്ഞു. ഖുര്‍ആന്‍ കത്തിച്ചതുമായി ബന്ധപ്പെട്ട കേസില്‍ കോടതി വിധി വരാന്‍ മണിക്കൂറുകള്‍ മാത്രം ശേഷിക്കെയാണ് സല്‍വാന്‍ മോമിക കൊല്ലപ്പെട്ടത്. സംഭവവുമായി ബന്ധപ്പെട്ട് അഞ്ചു പേരെ അറസ്റ്റ് ചെയ്തതായി സ്വീഡിഷ് പോലീസ് പറഞ്ഞു. ഒരു വംശീയ, അല്ലെങ്കില്‍ ദേശീയ ഗ്രൂപ്പിനെതിരായ പ്രക്ഷോഭ കുറ്റകൃത്യങ്ങള്‍ നടത്തി എന്ന കേസില്‍ വ്യാഴാഴ്ച മോമികക്കും മറ്റൊരാള്‍ക്കുമെതിരേ സ്റ്റോക്ക്ഹോം കോടതി വിധി പുറപ്പെടുവിക്കേണ്ടതായിരുന്നു. പക്ഷേ, വിധി മാറ്റിവച്ചതായി കോടതി പറഞ്ഞു.
വെടിയേറ്റപ്പോള്‍ മോമിക ടിക് ടോക്കില്‍ ലൈവ് സ്ട്രീം ചെയ്യുകയായിരുന്നുവെന്ന് സ്വീഡിഷ് മാധ്യമങ്ങള്‍ റിപ്പോര്‍ട്ട് ചെയ്തു. പോലീസ് സ്ഥലത്തെത്തിയാണ് മോമികയുടെ ഫോണ്‍ എടുത്ത് ടിക് ടോക്ക് അക്കൗണ്ടില്‍ നിന്നുള്ള ലൈവ് സ്ട്രീം അവസാനിപ്പിച്ചത്. ഖുര്‍ആന്‍ കത്തിച്ചതിനെ സ്വീഡിഷ് സര്‍ക്കാര്‍ അപലപിച്ചെങ്കിലും, തുടക്കത്തില്‍ അഭിപ്രായ സ്വതന്ത്ര്യ പ്രകടനത്തിന്റെ ഒരു സംരക്ഷിത രൂപമായി അതിനെ കണക്കാക്കി.
താമസ അപേക്ഷയില്‍ തെറ്റായ വിവരങ്ങള്‍ നല്‍കിയതിന് സ്വീഡനിലെ മൈഗ്രേഷന്‍ ഏജന്‍സി മോമികയെ നാടുകടത്താന്‍ ആഗ്രഹിച്ചിരുന്നു. പക്ഷേ, ഇറാഖില്‍ പീഡനവും മനുഷ്യത്വരഹിതമായ പെരുമാറ്റവും നേരിടേണ്ടിവരുമെന്ന് കരുതി നാടുകടത്തിയിരുന്നില്ല. സല്‍വാന്‍ മോമികയെ അറസ്റ്റ് ചെയ്ത് കൈമാറണമെന്ന് ഇറാഖ് സ്വീഡനോട് ആവശ്യപ്പെടുകയും ചെയ്തിരുന്നു. ഖുര്‍ആന്‍ കത്തിച്ച കേസിലെ മറ്റൊരു പ്രതി ‘അടുത്തത് ഞാനാണ്’ എന്ന് പറഞ്ഞുകൊണ്ട് എക്‌സില്‍ സന്ദേശം പോസ്റ്റ് ചെയ്തു.