മ്യുണിക്ക്: സൗദി പ്രോ ലീഗിലേക്ക് പുതുതായി സ്ഥാനകയറ്റം ലഭിച്ച അല്‍ ഖദ്‌സിയ റയല്‍ മാഡ്രിഡ് ക്യാപ്റ്റന്‍ നാച്ചോ ഫെര്‍ണാണ്ടസുമായി കരാറിലെത്തി. റയലിനൊപ്പം നിരവധി കിരീടങ്ങള്‍ സ്വന്തമാക്കിയ നാച്ചോ ഫ്രീ ട്രാന്‍സ്ഫറിലാണ് ക്ലബ്ബിലെത്തുന്നത്. റയലുമായുള്ള കരാര്‍ അടുത്തിടെ അവസാനിച്ചിരുന്നു. തുടര്‍ന്ന് താരത്തെ ക്ലബ്ബിലെത്തിക്കാനുള്ള ചര്‍ച്ചകള്‍ തുടരുകയായിരുന്നു. വമ്പൻ ഓഫറിലാണ് താരം സൗദി ക്ലബിലെത്തുന്നത്.
കഴിഞ്ഞ ദിവസമാണ് നാച്ചോ ടീമിലെത്തുമെന്ന് അല്‍ ഖദ്‌സിയ സോഷ്യല്‍ മീഡിയയിലൂടെ അറിയിച്ചത്. കാത്തിരിപ്പ് അവസാനിച്ചു. ചാംപ്യന്‍മാരുടെ ക്യാപ്റ്റന്‍ അല്‍ ഖദ്‌സിയില്‍ എന്ന അടിക്കുറപ്പോടെയാണ് വാര്‍ത്ത പുറത്ത് വിട്ടത്. നിലവില്‍ താരം യൂറോ കപ്പ് കളിക്കുന്ന സ്‌പെയിന്‍ ടീമിനൊപ്പമാണുള്ളത്.
2012ലാണ് നാച്ചോ റയലില്‍ എത്തുന്നത്. എന്നാല്‍ തുടക്കകാലം താരത്തിന് മോശമായിരുന്നു. തുടര്‍ന്ന് അടുത്തിടെയാണ് റയല്‍ ടീമിലെ സ്ഥിര സാന്നിധ്യമായി മാറിയത്. അടുത്തിടെ നടന്ന ചാംപ്യന്‍സ് ലീഗ് ഫൈനലില്‍ ബോറൂസിയ ഡോര്‍ട്ട്മുണ്ടിനെ പരാജയപ്പെടുത്തി റയല്‍ കിരീടം നേടിയിരുന്നു.നാച്ചോയുടെ ക്യാപ്റ്റന്‍സിയിലാണ് റയല്‍ തങ്ങളുടെ റെക്കോഡ് ചാംപ്യന്‍സ് ലീഗ് കിരീടം സ്വന്തമാക്കിയത്.
റയലിനായി നാല് സ്പാനിഷ് ലീഗ് കിരീടവും ആറ് ചാംപ്യന്‍സ് ലീഗ് കിരീടവും നിരവധി യൂറോപ്യന്‍ കിരീടങ്ങളും നേടിയിട്ടുണ്ട്.