മലപ്പുറം–മലപ്പുറം ജില്ലയിലെ കോട്ടക്കലില്‍ നിപ സമ്പര്‍ക്ക പട്ടികയിലുള്‍പ്പെടുത്തി ചികിത്സയിലായിരുന്ന സ്ത്രീ മരണപ്പെട്ടു. മങ്കടയില്‍ നിപ ബാധിച്ച് മരിച്ച പെണ്‍കുട്ടിക്കൊപ്പം ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലുണ്ടായിരുന്ന യുവതിയാണ് ഇന്ന് മരിച്ചത്. ആരോഗ്യ വകുപ്പിന്റെ പ്രോട്ടോകോള്‍ പ്രകാരം ഇവര്‍ ഹൈ റിസ്‌ക്ക് സമ്പര്‍ക്ക പട്ടികയിലായിരുന്നു. ഇന്ന് ഉച്ചയോടെ ഇവര്‍ മരണത്തിന് കീഴടങ്ങുകയായിരുന്നുവെന്ന് ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു. അതേസമയം, മൃതദേഹം സംസ്‌ക്കരിക്കാനുള്ള ബന്ധുക്കളുടെ ശ്രമം ആരോഗ്യ വകുപ്പ് തടഞ്ഞു. പരിശോധന ഫലം വരുന്നതുവരെ മൃതദേഹം സംസ്‌ക്കരിക്കരുതെന്നും ആരോഗ്യ വകുപ്പ് കര്‍ശന നിര്‍ദേശം നല്‍കി. മലപ്പുറത്ത് 18 പേര്‍ ചികിത്സയില്‍ കഴിയുന്നുണ്ട്. കൂടാതെ ഇതുവരെ ജില്ലയിലെ 42 പേരുടെ സാമ്പിളുകള്‍ നെഗറ്റീവ് ആയിട്ടുണ്ട്.
സംസ്ഥാനത്ത് ആകെ 485 പേര്‍ നിപ സമ്പര്‍ക്കപ്പട്ടികയില്‍ ഉള്ളതായി ഇന്നലെ ആരോഗ്യമന്ത്രി വീണാ ജോര്‍ജ് അറിയിച്ചിരുന്നു. മലപ്പുറം ജില്ലയിലാണ് ഏറ്റവും കൂടുതല്‍ പേരുള്ളത്. 192 പേര്‍. കോഴിക്കോട് 114 പേരും പാലക്കാട് 176 പേരും എറണാകുളത്ത് 2 പേരുമാണുള്ളത്. കണ്ണൂരില്‍ ഒരാളുമുണ്ട്. പാലക്കാട് ഇതുവരെ 7 സാമ്പിളുകള്‍ നെഗറ്റീവ് ആയിട്ടുണ്ട്. സംസ്ഥാനത്ത് 26 പേര്‍ ഹൈയെസ്റ്റ് റിസ്‌ക് വിഭാഗത്തിലും 117 പേര്‍ ഹൈറിസ്‌ക് വിഭാഗത്തിലും നിരീക്ഷണത്തിലാണ്. നിപ സ്ഥിരീകരിച്ച രോഗി കോഴിക്കോട് ഐസിയു വില്‍ ചികിത്സയില്‍ കഴിയുകയാണെന്നും കേരളാ ആരോഗ്യ വകുപ്പു മന്ത്രി വിശദീകരിച്ചു.