ജിദ്ദ – ഈജിപ്ത് സന്ദർശനം പൂർത്തിയാക്കി സൗദി അറേബ്യയുടെ പ്രധാനമന്ത്രിയും കിരീടാവകാശിയുമായ മുഹമ്മദ് ബിൻ സൽമാൻ രാജകുമാരൻ കയ്റോയിൽനിന്ന് മടങ്ങി. ഈജിപ്ഷ്യന്‍ പ്രസിഡന്റ് അബ്ദുല്‍ഫത്താഹ് അല്‍സീസി അടക്കമുള്ളവർ മുഹമ്മദ് ബിൻ സൽമാൻ രാജകുമാരനെ യാത്രയയക്കാൻ എത്തിയിരുന്നു.
സൗദി അറേബ്യയും ഈജിപ്തും തമ്മിലുള്ള സഹകരണവും ബന്ധങ്ങളും പുതിയ ഉയരങ്ങളിലെത്തിക്കാന്‍ ലക്ഷ്യമിട്ട് സൗദി, ഈജിപ്ഷ്യന്‍ സുപ്രീം കോ-ഓര്‍ഡിനേഷന്‍ കൗണ്‍സില്‍ സ്ഥാപിക്കാൻ കൂടിക്കാഴ്ച്ചയിൽ തീരുമാനിച്ചു. കയ്‌റോ അല്‍ഇത്തിഹാദിയ പാലസില്‍ ഇരു രാജ്യങ്ങളിലെയും സംഘങ്ങള്‍ നടത്തിയ വിപുലമായ ചര്‍ച്ചക്കിടെ ഇതിനുള്ള മിനുട്‌സില്‍ രണ്ടു രാജ്യങ്ങളിലെയും മന്ത്രിമാര്‍ ഒപ്പുവെച്ചു. നിക്ഷേപ പ്രോത്സാഹന കരാറും ഇരു രാജ്യങ്ങളും ഒപ്പുവെച്ചു. ഔദ്യോഗിക സന്ദര്‍ശനാര്‍ഥം എത്തിയ സൗദി കിരീടാവകാശിയെ കയ്‌റോ ഇന്റര്‍നാഷണല്‍ എയര്‍പോര്‍ട്ടില്‍ ഈജിപ്ഷ്യന്‍ പ്രസിഡന്റിന്റെ നേതൃത്വത്തില്‍ ഊഷ്മളമായി സ്വീകരിച്ചു.