മദീന – മദീനയില്‍ മലവെള്ളപ്പാച്ചിലില്‍ പെട്ട കാറിലെ യാത്രക്കാരായ നാലു സ്വദേശി യുവാക്കളെ സ്വന്തം ജീവന്‍ പോലും പരിഗണിക്കാതെ രക്ഷിച്ചതിന് സൗദി യുവാവ് ഫഹദ് അല്‍ഹര്‍ബിക്ക് കാര്‍ സമ്മാനം. ഫഹദ് അല്‍ഹര്‍ബി രക്ഷിച്ച യുവാക്കളുടെ പിതാവ് മര്‍സൂഖ് അല്‍ജുഹനിയാണ് യുവാവിന് പുതിയ മോഡല്‍ കാര്‍ സമ്മാനിച്ചത്. മദീനയിലെ ഓഡിറ്റോറിയത്തില്‍ പ്രത്യേക ആദരിക്കല്‍ ചടങ്ങ് സംഘടിപ്പിച്ച മര്‍സൂഖ് അല്‍ജുഹനി ചടങ്ങില്‍ വെച്ച് തന്റെ മക്കളെ രക്ഷിച്ചതിന് ഫഹദ് അല്‍ഹര്‍ബിക്ക് നന്ദി പറഞ്ഞു.
തുടര്‍ന്നാണ് അപ്രതീക്ഷിതമായി പുതിയ മോഡല്‍ കാര്‍ യുവാവിന് മര്‍സൂഖ് അല്‍ജുഹനി സമ്മാനിക്കുന്നതായി പ്രഖ്യാപിക്കുകയും കാറിന്റെ താക്കോല്‍ കൈമാറുകയും ചെയ്തത്. ഇതിന് സാക്ഷികളായവര്‍ ഹര്‍ഷാരവം മുഴക്കി ആഹ്ലാദം പ്രകടിപ്പിച്ചു. യുവാവിന്റെ ധീരതയെ ആവോളം പ്രശംസിച്ച് ചടങ്ങില്‍ പങ്കെടുത്ത അല്‍ജുഹനി ഗോത്രപ്രമുഖന്‍ സംസാരിക്കുകയും ചെയ്തു. ഇതിന്റെ ദൃശ്യങ്ങള്‍ അടങ്ങിയ വീഡിയോ സാമൂഹികമാധ്യമങ്ങളില്‍ വൈറലായി.