മലപ്പുറം– എഴുത്തുകാര്‍ മുഴുവന്‍ സ്വരാജിനൊപ്പമെന്ന് പ്രഖ്യാപിക്കാന്‍ ആരാണ് വൈശാഖിനെ ചുമതലപ്പെടുത്തിയതെന്ന ചോദ്യവുമായി പ്രശസ്ത എഴുത്തുകാരന്‍ കല്‍പ്പറ്റ നാരായണന്‍. നിലമ്പൂരിലെ ഇടതുപക്ഷ മുന്നണി സ്ഥാനാര്‍ത്ഥി എം.സ്വരാജിനെ പിന്തുണച്ചും പ്രതിപക്ഷ നേതാവ് വി.ഡി സതീശനെ ആക്ഷേപിച്ചും എഴുത്തുകാരന്‍ വൈശാഖന്റെ പ്രസ്താവനയില്‍ ‘സാഹിത്യകാരന്മാര്‍ ബുദ്ധിയുള്ളവരാണ്, ഏത് പിന്തുണയ്ക്കണം പിന്തുണയ്‌ക്കേണ്ട എന്നുള്ളത് കൃത്യമായി അറിയാമെന്നും’ അദ്ദേഹം പറഞ്ഞിരുന്നു. ഇതിനെതിരെയാണ് കല്‍പ്പറ്റ നാരായണന്‍ രംഗത്തെത്തിയത്.
”വൈശാഖന്‍ ഒരു കമ്മ്യൂണിസ്റ്റുകാരനാണ്. അതുകൊണ്ട് മാത്രം അംഗീകാരം കിട്ടിയ ആള്‍ക്ക് തീര്‍ച്ചയായും പിന്തുണക്കാം. സ്വരാജ് വായിച്ചതുകൊണ്ട് പാര്‍ട്ടിക്ക് പുറത്തുള്ളവര്‍ക്ക് ആര്‍ക്ക് പ്രയോജനം?. പാര്‍ട്ടിയുടെ ദുഷ്‌ചെയ്തികളെ എതിര്‍ക്കുകയോ വിമര്‍ശിക്കന്‍ വേണ്ട ഇച്ഛാശക്തി കാണിക്കുകയോ ചെയ്തിട്ടുള്ള ആളല്ല സ്വരാജ്”- കല്‍പറ്റ പറഞ്ഞു.
സാഹിത്യകാരന്മാരുടെ പരസ്യ രാഷ്ട്രീയ നിലപാടിനെതിരെ സാറാജോസഫ്, പിഎഫ് മാത്യൂസ് എന്നിവരും രംഗത്തെത്തി. സ്വരാജ് വന്നാലും ഷൗക്കത്ത് വന്നാലും ബിജെപി വന്നാലും ഏമാന്മാര്‍ക്ക് ആശമാരുടേത് പോലെ അവഗണിക്കപ്പെടുന്ന മനുഷ്യരുടെ പ്രശ്‌നങ്ങളൊന്നും പ്രശ്‌നങ്ങളായേ തോന്നുന്നില്ലെന്നായിരുന്നു സാറാജോസഫിന്റെ പ്രതികരണം. നിലമ്പൂരില്‍ വോട്ടില്ലാത്തതിനാല്‍ കണ്ണീരൊഴുക്കുകയും വാവിട്ടുകരയുകയും ചെയ്യുന്ന എഴുത്തുകാരെ ഓര്‍ത്ത് പൊട്ടിക്കരഞ്ഞുപോവുന്നുവെന്നായിരുന്നു പി.എഫ് മാത്യൂസിന്റെ പരിഹാസം. കവി റഫീഖ് അഹ്‌മദ് കാര്‍ട്ടുണുമായി ഹാസ്യാത്മകമായ വിമര്‍ശനവുമായി രംഗത്തെത്തി. പതിനാറാം നൂറ്റാണ്ടില്‍ ജനിച്ച പൂന്താനം നമ്പൂതിരി തന്റെ വോട്ട് അന്‍വറിന് എന്ന് പ്രഖ്യാപിക്കുന്നതാണ് കാര്‍ട്ടൂണ്‍.
അതേസമയം പ്രമുഖ എഴുത്തുകാരായ എം.മുകുന്ദന്‍, സച്ചിദാനന്ദന്‍, കെ.ആര്‍ മീര തുടങ്ങിയവര്‍ എല്‍ഡിഎഫ് സ്ഥാനാര്‍ത്ഥി എം സ്വരാജിന് പിന്തുണയര്‍പ്പിച്ച് രംഗത്തെത്തിയിരുന്നു. കഴിഞ്ഞ ദിവസം നടത്തിയ വാര്‍ത്താസമ്മേളനത്തിലാണ് സാഹിത്യകാരന്മാര്‍ക്കെതിരെ പ്രതിപക്ഷനേതാവ് വിഡി സതീശന്‍ രംഗത്തെത്തിയത്. ആശാ സമരം കാണാത്തവര്‍ സ്വരാജിന് പിന്തുണയുമായി എത്തിയെന്നായിരുന്നു അദ്ദേഹത്തിന്റെ പ്രതികരണം. ആശാസമരം സംസ്ഥാന സര്‍ക്കാര്‍ പരിഗണിച്ചില്ല എന്നത് തെറ്റാണെന്നും ഏറ്റവും ഉയര്‍ന്ന ഓണറേറിയം നല്‍കുന്നത് കേരള സര്‍ക്കാരാണെന്നുമായിരുന്നു വൈശാഖന്റെ മറുപടി.