റിയാദ്- അരാംകോ ഓഹരികൾ വാങ്ങാതെ മടി കാണിച്ചവർ അധികം വൈകാതെ ഖേദത്തോടെ വിരലുകൾ കടിക്കേണ്ടി വരുമെന്ന് ഊർജ മന്ത്രി അബ്ദുൽ അസീസ് ബിൻ സൽമാൻ രാജകുമാരൻ. ജഫൗറ ഫീൽഡ് പദ്ധതിയുടെ രണ്ടാം ഘട്ടത്തിനും പ്രധാന ഗ്യാസ് നെറ്റ്‌വർക്ക് വിപുലീകരണ പദ്ധതിയുടെ മൂന്നാം ഘട്ടത്തിനുമുള്ള കരാറുകളിൽ ഇന്ന് (ഞായർ) ഒപ്പുവെച്ച ശേഷം സംസാരിക്കുകയായിരുന്നു അദ്ദേഹം.
2030 ഓടെ സൗദിയുടെ വാതക ഉൽപ്പാദനം 63% വർദ്ധിക്കുമെന്നും 13.5 ബില്യൺ ക്യുബിക് അടിയിൽ നിന്ന് 2030 ഓടെ ഏകദേശം 21.3 ബില്യൺ ക്യുബിക് അടിയായി മാറുമെന്നും അബ്ദുൽ അസീസ് ബിൻ സൽമാൻ രാജകുമാരൻ പറഞ്ഞു.
ഇന്ന് പ്രഖ്യാപിച്ച കരാറുകൾ 25 ബില്യൺ ഡോളറിലധികം മൂല്യമുള്ളതാണെന്ന് അരാംകോ പ്രസിഡൻ്റ് അമിൻ നാസർ പറഞ്ഞു, കൂടാതെ സൗദിയുടെ വാതക ശേഷിയെ ഒരു പുതിയ തലത്തിലേക്ക് കൊണ്ടുപോകുന്ന രണ്ട് വലിയ പദ്ധതികൾ കരാറിൽ ഉൾപ്പെടുന്നു.
വിവിധ നഗരങ്ങളെ ബന്ധിപ്പിക്കുന്ന ഗ്യാസ് സംവിധാനം വിപുലീകരിക്കുന്നതാണ് ആദ്യപദ്ധതി. ജിദ്ദ, ജിസാൻ, അൽ-ഖർജ് എന്നിവയ്ക്ക് ഈ സംവിധാനത്തിൽ നിന്ന് ആദ്യമായി ഗ്യാസ് ലഭിക്കും. ഈ പദ്ധതി വ്യവസായത്തിന് സംഭാവന നൽകും.
ഈ വാതകത്തിൽ നിന്ന് 50% വൈദ്യുതി ലഭ്യമാക്കാനാകും. മിഡിൽ ഈസ്റ്റിലെ ഏറ്റവും വലിയ വാതക ഫീൽഡ് ആയി അൽ-ജഫൗറയെ വികസിപ്പിക്കുമെന്നും അദ്ദേഹം കൂട്ടിച്ചേർത്തു.