ബെയ്റൂത്ത്- പേജറുകൾ പൊട്ടിത്തെറിച്ചതിന് പിന്നാലെ ലെബനോണിൽ ഹിസ്ബുള്ള ഗ്രൂപ്പിന്റെ കേന്ദ്രത്തിൽ വാക്കി ടോക്കികളും പൊട്ടിത്തെറിച്ചു. സ്ഫോടനത്തിൽ മൂന്നു പേർ മരിച്ചുവെന്നാണ് ഔദ്യോഗിക വിവരം. ഹിസ്ബുള്ള ഗ്രൂപ്പ് അംഗങ്ങൾ ഉപയോഗിച്ചിരുന്ന വാക്കി ടോക്കികളാണ് ബെയ്റൂത്തിലെ ശക്തികേന്ദ്രത്തിൽ പൊട്ടിത്തെറിച്ചത്. ലെബനോണിൽ പേജറുകൾ പൊട്ടിത്തെറിച്ച് പതിനൊന്ന് പേർ മരിച്ചതിന് സമാനമാണ് പുതിയ സ്ഫോടനവും.
ബെയ്‌റൂത്തിന്റെ തെക്കൻ പ്രാന്തപ്രദേശങ്ങളിൽ നിരവധി വാക്കി ടോക്കികൾ പൊട്ടിത്തെറിക്കുകയായിരുന്നു. പ്രദേശത്തെ രണ്ട് കാറുകൾക്കുള്ളിൽ ഉപകരണങ്ങൾ പൊട്ടിത്തെറിച്ചതായി ഹിസ്ബുള്ളയുമായി ബന്ധപ്പെട്ട രക്ഷാപ്രവർത്തകർ സ്ഥിരീകരിച്ചു. ഏറ്റവും പുതിയ സ്ഫോടനത്തിൽ ലെബനനിലെ ബേക്ക മേഖലയിൽ മൂന്ന് പേർ കൊല്ലപ്പെട്ടതായി സംസ്ഥാന വാർത്താ ഏജൻസി റിപ്പോർട്ട് ചെയ്തു.
ഹിസ്ബുല്ല പോരാളികളും അംഗങ്ങളും രഹസ്യ ആശയവിനിമയത്തിന് ഉപയോഗിക്കുന്ന പേജറുകള്‍ കൂട്ടത്തോടെ പൊട്ടിത്തെറിച്ച് മരണപ്പെട്ടവരുടെ എണ്ണം 11 ആയി ഉയര്‍ന്നതായി ലെബനീസ് മാധ്യമങ്ങള്‍ റിപ്പോര്‍ട്ട് ചെയ്തു. പരിക്കേറ്റ് ആശുപത്രികളില്‍ പ്രവേശിപ്പിച്ചവരുടെ എണ്ണം 4,000 കവിഞ്ഞതായി ലെബനീസ് ആരോഗ്യ മന്ത്രാലയം അറിയിച്ചു. പരിക്കേറ്റവരില്‍ 400 പേരുടെ നില ഗുരുതരമാണ്. സ്‌ഫോടനങ്ങളില്‍ 500 ഹിസ്ബുല്ല പ്രവര്‍ത്തകരുടെ കണ്ണുകള്‍ നഷ്ടപ്പെട്ടതായി ലെബനീസ് മാധ്യമങ്ങള്‍ റിപ്പോര്‍ട്ട് ചെയ്തു.
ആയിരക്കണക്കിന് പേജറുകള്‍ പൊട്ടിത്തെറിച്ച് 12 പേര്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്തതിന്റെ ആഘാതത്തില്‍ നിന്ന് മുക്തമാകുന്നതിനു മുമ്പാണ് എല്ലാവരെയും ഞെട്ടിച്ച് വാക്കിടോക്കികളും പൊട്ടിത്തെറിച്ചത്. ലെബനോനിലെ വിവിധ നഗരങ്ങളിലും പ്രദേശങ്ങളിലും ഇന്ന് വാക്കിടോക്കി സ്‌ഫോടനങ്ങള്‍ റിപ്പോര്‍ട്ട് ചെയ്തു. ഇന്നലെയുണ്ടായ പേജര്‍ സ്‌ഫോടനത്തില്‍ കൊല്ലപ്പെട്ടവരുടെ മയ്യിത്തുകള്‍ മറവു ചെയ്യുന്നതുമായി ബന്ധപ്പെട്ട അനന്തര ചടങ്ങുകളില്‍ സംബന്ധിച്ച ജനക്കൂട്ടത്തിനിടയിലും വാക്കിടോക്കികള്‍ പൊട്ടിത്തെറിച്ചു. സ്‌ഫോടനം ശബ്ദം കേട്ട് പരിഭ്രാന്തരായ സ്ത്രീകള്‍ അടക്കമുള്ളവര്‍ നാലു പാടും ചിതറിയോടി. വാക്കിടോക്കി സ്‌ഫോടനത്തില്‍ വീടുകളിലും ഫ്‌ളാറ്റുകളിലും വാഹനങ്ങളിലും തീ പടര്‍ന്നുപിടിച്ചു.