കോഴിക്കോട് ചേവായൂരിൽ കാർ കിണറിലേക്ക് മറിഞ്ഞു; അത്ഭുത രക്ഷ

കോഴിക്കോട്: നിയന്ത്രണം വിട്ട കാർ കിണറ്റിലേക്ക് മറിഞ്ഞ് അത്ഭുത രക്ഷ. ചേവായൂർ നെയ്ത്കുളങ്ങരയിലാണ് സംഭവം. ചേവായൂർ എ.കെ.വി.കെ റോഡിൽ രാധാകൃഷ്ണൻ ഓടിച്ച കാറാണ് ശനിയാഴ്ച രാത്രി മറിഞ്ഞത്.

പോക്കറ്റ് റോഡിൽനിന്ന് പ്രധാന റോഡിലേക്ക് കയറുന്നതിനിടെ സമീപത്തുള്ള വീടിന്റെ മതിൽ തകർത്ത് കാർ തലകീഴായി കിണറിലേക്ക് പതിച്ചെങ്കിലും കിണറിന്റെ ഇരുമ്പുനെറ്റിൽ തങ്ങി വൻ അപകടം ഒഴിവാകുകയായിരുന്നു.

കാറിനുള്ളിൽ കുടുങ്ങിയ രാധാകൃഷ്ണനെ വെള്ളിമാടുകുന്ന് അഗ്‌നിരക്ഷാ സേനയെത്തി രക്ഷപ്പെടുത്തി. ഇയാളെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പരുക്ക് ഗുരുതരമല്ലെന്നാണ് വിവരം.