കയ്റോ: ഫലസ്തീൻ നഗരമായ റഫയെ ആക്രമിക്കാനുള്ള ഇസ്രായിൽ നീക്കത്തിനെതിരെ ശക്തമായ മുന്നറിയിപ്പുമായി അറബ് പാർലമെന്റ്. ഒന്നര ദശലക്ഷം ഫലസ്തീനികൾക്കെതിരായ ഏറ്റവും നികൃഷ്ടമായ വംശഹത്യയിൽ കലാശിച്ചേക്കാവുന്ന ഇസ്രായേൽ അധിനിവേശത്തിൻ്റെ തയ്യാറെടുപ്പിനെക്കുറിച്ച് അറബ് പാർലമെൻ്റ് മുന്നറിയിപ്പ് നൽകി.
ഫലസ്തീൻ ജനതയ്‌ക്കെതിരായ കൂട്ടക്കൊലകളും കുറ്റകൃത്യങ്ങളും തടയാൻ ഇസ്രായേലിന് മേൽ സമ്മർദ്ദം ചെലുത്തണമെന്ന് അറബ് പാർലമെൻ്റ് ഇന്ന് പുറത്തിറക്കിയ പ്രസ്താവനയിൽ യു.എസ് ഭരണകൂടത്തോടും അന്താരാഷ്ട്ര സമൂഹത്തോടും അഭ്യർത്ഥിച്ചു. അന്താരാഷ്ട്ര നിയമങ്ങൾക്കെതിരെ നടത്തുന്ന ഗുരുതരമായ നിയമലംഘനങ്ങൾക്ക് ഇസ്രായിലിനെ പ്രതിയാക്കണമെന്നും പ്രസ്താവന ആവശ്യപ്പെട്ടു.
ഗാസ മുനമ്പിലായാലും വെസ്റ്റ് ബാങ്കിലായാലും ഫലസ്തീൻ ജനതയ്‌ക്കെതിരായ വംശഹത്യ തുടരാൻ ഇസ്രായേൽ അധിനിവേശ നേതാക്കൾക്ക് ധൈര്യം നൽകിയ ലജ്ജാകരമായ നിശബ്ദതയെ അറബ് പാർലമെൻ്റ് അപലപിച്ചു.
വെടിനിർത്തലിൻ്റെയും സമാധാനത്തിൻ്റെയും പ്രാധാന്യവും ഫലസ്തീൻ പ്രശ്നത്തിന് ന്യായമായ പരിഹാരം തേടേണ്ടതിൻ്റെ ആവശ്യകതയും അറബ് പാർലമെന്റ് ആവർത്തിച്ചു. ജറുസലേമിനെ തലസ്ഥാനമാക്കി ഒരു സ്വതന്ത്ര ഫലസ്തീൻ രാഷ്ട്രം സ്ഥാപിക്കാനും പ്രമേയം ആവശ്യപ്പെട്ടു.