കൊച്ചി– ഹെയര്‍ ട്രാന്‍സ്പ്ലാന്റേഷന്‍ ചെയ്തതിന് പിന്നാലെ ഗുരുതര ആരോഗ്യ പ്രശ്‌നങ്ങള്‍ കാരണം ആശുപത്രിയില്‍ ചികിത്സയിലായി യുവാവ്. എളമക്കര കീര്‍ത്തിനഗറില്‍ താമസിക്കുന്ന ചെറായി ചെറു പറമ്പില്‍ സനിലാണ് അണുബാധയെ തുടര്‍ന്ന് ചികിത്സയില്‍ കഴിയുന്നത്. പനമ്പിള്ളി നഗറില്‍ പ്രവര്‍ത്തിക്കുന്ന ക്ലിനിക്കില്‍ നിന്നാണ് യുവാവ് കൃത്രിമമായി മുടിവച്ചു പിടിപ്പിക്കുന്ന ചികിത്സയ്ക്ക് വിധേയനായത്. 2025 ഫെബ്രുവരി 26,27 തീയതികളിലാണ് ഹെയര്‍ ട്രാന്‍സ്പ്ലാന്റേഷന്‍ നടത്തിയത്. ദിവസങ്ങള്‍ക്കകം തലയില്‍ ചൊറിച്ചിലും വേദനയും അനുഭവപ്പെട്ടു.
തലയിലെ വേദന സഹിക്കാന്‍ കഴിയാതെ വന്നപ്പോള്‍ സ്ഥാപന അധികൃതരെ അറിയിക്കുകയും എന്നാല്‍ വേദന സംഹാരി നല്‍കി യുവാവിനെ മടക്കി അയക്കുകയുമായിരുന്നു. സ്ഥിതി വഷളായതോടെ എറണാകുളത്തെ സ്വകാര്യ ആശുപത്രിയില്‍ ചികിത്സ തേടി. പരിശോധനയില്‍ മുടിവച്ചുപിടിപ്പിച്ച ഭാഗത്ത് ഗുരുതരമായ അണുബാധ കണ്ടെത്തി. തലയില്‍ പഴുപ്പ് വര്‍ധിക്കുകയും തൊലി നഷ്ടപെടുകയും ചെയ്തു. ഇതിനോടകം തന്നെ 13ഓളം ശസ്ത്രക്രിയകള്‍ക്ക് യുവാവ് വിധേയനായി. പനമ്പള്ളി നഗരത്തിലെ സ്ഥാപനത്തിന് യുവാവ് നിയമ നടപടിക്ക് ഒരുങ്ങിയതോടെ ഉടമ ക്ലിനിക്ക് പൂട്ടി മുങ്ങിയിരിക്കുകയാണെന്നാണ് റിപ്പോര്‍ട്ട്.