ബൈക്കും പിക്കപ്പും കൂട്ടിയിടിച്ച് രണ്ട് യുവാക്കൾക്ക് ദാരുണാന്ത്യം

കണ്ണൂർ: കണ്ണൂർ നൂഞ്ഞേരി മുണ്ടേരിക്കടവ് പാലത്തിനു സമീപം ബൈക്കും പിക്കപ്പും കൂട്ടിയിടിച്ച് ബൈക്ക് യാത്രക്കാരായ രണ്ട് യുവാക്കൾക്ക് ദാരുണാന്ത്യം.

കണ്ണൂരിലെ ലുലു ഗോൾഡ് ജീവനക്കാരൻ കയ്യങ്കോട് കല്ലുവളപ്പിൽ ഹാരിസ്-എം.പി നസീമ ദമ്പതികളുടെ മകൻ കയ്യങ്കോട്ട് അജാസ് (22), കണ്ണാടിപ്പറമ്പിലെ ഡ്രൈവർ സുരേഷ്-ശ്യാമള ദമ്പതികളുടെ മകൻ വിഷ്ണു(22) എന്നിവരാണ് മരിച്ചത്. ഇരുവരെയും ഉടനെ കണ്ണൂരിലെ എ.കെ.ജി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ചൊവ്വാഴ്ച വൈകീട്ടാണ് അപകടമുണ്ടായത്.

മുണ്ടേരി ഭാഗത്തേക്ക് പോവുകയായിരുന്ന പിക്കപ്പും കണ്ണാടിപ്പറമ്പ് ഭാഗത്തേക്ക് വരികയായിരുന്ന ബൈക്കും തമ്മിൽ കൂട്ടിയിടിക്കുകയായിരുന്നു.