‘വോട്ട് ചെയ്യിക്കാൻ ഖുർആൻ തൊട്ട് സത്യം ചെയ്യിച്ചു’; ആരോപണവുമായി സി പി എം

• യു ഡി എഫ് മതവർഗീയതയോട് കൂട്ടുകൂടിയെന്ന് ആരോപണം

പാലക്കാട്: ഉപതെരഞ്ഞെടുപ്പിൽ യു ഡി എഫ് മതവർഗീയതയോട് കൂട്ടുകൂടിയെന്ന് സി.പി.എം പാലക്കാട് ജില്ലാ സെക്രട്ടറി ഇ.എൻ സുരേഷ് ബാബു. യു.ഡി.എഫ് സ്ഥാനാർത്ഥി രാഹുൽ മാങ്കൂട്ടത്തിലിന് വോട്ട് ചെയ്യിക്കാൻ വീടുകൾ കയറി ഖുർആനിൽ തൊട്ട് സത്യം ചെയ്യിച്ചതായി അദ്ദേഹം പറഞ്ഞു.

എസ് ഡി പി ഐയും ജമാഅത്തെ ഇസ്‌ലാമിയുമാണ് ഇപ്രകാരം വീടുകളിൽ കയറി യു.ഡി.എഫിനായി പണി ചെയ്യിച്ചതെന്നും അദ്ദേഹം മാധ്യമങ്ങളോട് പറഞ്ഞു.

മണ്ഡലത്തിൽ 2021-ൽ ഇ ശ്രീധരന് കിട്ടിയ പിന്തുണ ഡോ. പി സരിനും ലഭിച്ചു. ശ്രീധരന് കിട്ടിയതിനേക്കാൾ കൂടുതൽ വോട്ടും സരിന് കിട്ടുമെന്ന് അദ്ദേഹം അഭിപ്രായപ്പെട്ടു.

കണ്ണാടി, മാത്തൂർ പഞ്ചായത്തുകളിൽ കോൺഗ്രസ് ബൂത്തുകളിൽ ആളുണ്ടായില്ല. മാത്തൂരും കണ്ണാടിയിലും പാലക്കാട് നഗരസഭയിലും സി പി എമ്മിന് വലിയ മുന്നേറ്റമുണ്ടാക്കാനായി. പിരായിരിയിൽ കോൺഗ്രസ് വോട്ട് പോലും സി പി എമ്മിന് ലഭിച്ചതായും അദ്ദേഹം അവകാശപ്പെട്ടു.

വ്യാജ വോട്ട് നിയമപരമായി തടയാൻ സാധിച്ചു. വിഷയം നേരത്തെ ഉയർത്തിക്കൊണ്ടു വന്നതിനാൽ വ്യാജ വോട്ടുകാർ വോട്ട് ചെയ്യാൻ വന്നില്ല. കായിക കരുത്ത് കാട്ടാനല്ല സി പി എം വിഷയം ഉന്നയിച്ചത്, നീതിപൂർവം തെരഞ്ഞെടുപ്പ് നടക്കാനാണെന്നും സന്ദീപ് വാര്യരുടെ വരവ് ഡി സി സി പ്രസിഡന്റ് തങ്കപ്പൻ പോലും അറിഞ്ഞിട്ടില്ലെന്നും അദ്ദേഹം കളിയാക്കി.