കൊച്ചി : സംവിധായകന്‍ ജോഷിയുടെ വീട്ടില്‍ മോഷണം നടത്തിയ പ്രതി പിടിയില്‍. കര്‍ണാടക ഉഡുപ്പിയില്‍ നിന്നാണ് ബിഹാര്‍ സ്വദേശിയായ പ്രതി പിടിയിലായത്. കൊച്ചി പനമ്പള്ളി നഗറിലെ വീട്ടിൽ കഴിഞ്ഞ ദിവസം രാത്രി ഒരു മണിയോടെയാണ് മോഷണം നടന്നത്. സ്വർണ വജ്രാഭരണങ്ങൾക്ക് ഒപ്പം വിലപിടിപ്പുള്ള വസ്തുക്കളും പണവും നഷ്ടപ്പെട്ടു. സി സി ടിവിയില്‍ പതിഞ്ഞ മോഷ്ടാവിന്‍റെ ദൃശ്യങ്ങള്‍ കേന്ദ്രീകരിച്ച് പൊലീസ് നടത്തിയ അന്വഷണത്തിലാണ് പ്രതിയെ പിടികൂടിയത്.
രാവിലെ അടുക്കളയിലെ ജനാല തുറന്നു കിടക്കുന്നത് കണ്ടാണ് കള്ളൻ കയറിയ വിവരം വീട്ടുകാർ അറിയുന്നത്. ജോഷിയും കുടുംബവും വീട്ടിൽ ഉള്ളപ്പോഴാണ് മോഷണം നടന്നത്. അടുക്കള ജനാല വഴി വീടിനുള്ളിൽ കടന്ന കള്ളൻ മുറിയിലെ ലോക്കറിൽ സൂക്ഷിച്ചിരുന്ന സ്വർണ വജ്രാഭരണങ്ങളും വിലപിടിപ്പുള്ള വസ്തുക്കളും കവർന്നു. തൊപ്പി വച്ചിട്ടുള്ളതിനാൽ മുഖം ദൃശ്യങ്ങളിൽ വ്യക്തമല്ലായിരുന്നു. ഫോറൻസിക് സംഘവും പോലീസും വീട്ടിൽ പരിശോധന നടത്തി. പോലീസ് നായയെ ഉപയോഗിച്ചും പരിശോധിച്ചു