‘വഖഫ് ഭേദഗതിയെ എതിർക്കുന്നതിനൊപ്പം വഖഫ് സ്വത്തുക്കൾ വിറ്റുതുലച്ചവരുടെ നടപടിയെയും എതിർക്കണം’

ആലപ്പുഴ-വഖഫ് ഭേദഗതി ബില്ലിനെ എതിർക്കുന്നതുപോലെ വഖഫ് സ്വത്തുക്കൾ കയ്യേറുകയും വിറ്റു തുലക്കുകയും ചെയ്ത കേരള വഖഫ് ബോർഡ് കയ്യടക്കി വെച്ചവരുടെ നടപടികളേയും എതിർക്കപ്പെടണമെന്ന് ആലപ്പുഴ ഹാശിമിയ്യ ജനറൽ സെക്രട്ടറി പി കെ മുഹമ്മദ് ബാദ്ഷാ സഖാഫി. കുറഞ്ഞപക്ഷം വഖഫ് ബോർഡു കൊണ്ട് മത സ്ഥാപനങ്ങൾക്കെങ്കിലും പ്രയോജനം വേണമെന്ന് അദ്ദേഹം പറഞ്ഞു. ആലപ്പുഴ ജാമിഅ ഹാശിമിയ്യ സിൽവർ ജൂബിലി സമ്മേളനത്തിൽ സനദുദാന പ്രഭാഷണം നടത്തുകയായിരുന്നു അദ്ദേഹം. കാൽനൂറ്റാണ്ടിന്റെ മത വിദ്യാഭ്യാസ പ്രവർത്തനത്തിലൂടെ ആയിരക്കണക്കിന് പണ്ഡിതരെ നാടിനു സമർപ്പിച്ച ജാമിഅ ഹാശിമിയ്യ സിൽവർ ജൂബിലി
അഞ്ച് ദിവസം നീണ്ടു നിന്ന വിവിധ പരിപാടികളോടെ സമാപിച്ചു. സയ്യിദ് പി.എം എസ്.ആറ്റക്കോയ തങ്ങളുടെ അധ്യക്ഷതയിൽ സക്കറിയ ബസാർ മഖാം നഗറിൽ നടന്ന സമാപന സമ്മേളനം ഹദീസ് പണ്ഡിതൻ ശൈഖ് അനസ് മഹ് മൂദ് ഈസാവി ബാഗ് ദാദ് ഉദ്ഘാടനം ചെയ്തു.
ജാമിഅ മർക്കസ് പ്രസിഡന്റ് സയ്യിദ് അലി ബാഫഖി തങ്ങൾ 𝟐𝟕𝟎 യുവ പണ്ഡിതന്മാർക്ക് ഹാശിമി സനദ് നൽകി. സയ്യിദ് പി. എം.എസ് തങ്ങൾ വടുതല, സയ്യിദ് ഹസൻ കുഞ്ഞിക്കോയ തങ്ങൾ, എം.എ അബ്ദു റഷീദ് മദനി, എം ഹംസ സഖാഫി, കെ.എം. മുസ്തഫ സഖാഫി, ഹാഫിസ് കുമ്മനം നിസാമുദ്ദീൻ അസ്ഹരി, പി.പി മക്കാർ ഹാജി, എ അബ്ദുറഹീം സഖാഫി, എ.എ.ഷുക്കൂർ, ജയിംസ് ശാമുവേൽ, സൂര്യ ഷംസുദ്ദീൻ, എം.എസ് ജുനൈദ്, അജ്മൽ എം ജൗഹരി, ഹാഫിസ് നവാബ് സഖാഫി, പി കെ ജലാലുദ്ദീൻ മദനി, എസ്. അഷ്റഫ് സഖാഫി, അഡ്വ: ഇർഫാൻ ഇബ്രാഹീം സേട്ട്, ഹസൻ അബ്ദുൽഖാദർ, സയ്യിദ് അക്ബർ ഹാശിമി, ഐ മിഖ്ദാദ് ഹാശിമി, പി എം ഖലീഫ ഹാശിമി, അസ്ലം വട്ടപ്പള്ളി, എ അമീർ മണ്ണഞ്ചേരി സംസാരിച്ചു.