കോഴിക്കോട് – മുസ്ലിംലീഗ് സംസ്ഥാന കമ്മിറ്റി സംഘടിപ്പിക്കുന്ന ഫലസ്തീൻ ഐക്യദാർഢ്യ സമ്മേളനത്തിൽ മുഖ്യാതിഥിയായി ഇന്ത്യയിലെ ഫലസ്തീൻ അംബാസഡർ അബ്ദുല്ല മുഹമ്മദ് അബൂസാവേശ് പങ്കെടുക്കും. 25ന് വ്യാഴാഴ്ച വൈകിട്ട് 3 മണിക്ക് എറണാകുളം മറൈൻ ഡ്രൈവിലാണ് ഇസ്രായിലിന്റെ മനുഷ്യക്കുരുതിക്കെതിരെയുള്ള ഐക്യദാർഢ്യ സമ്മേളനം. ഫ്രണ്ട് ലൈൻ മുൻ സീനിയർ അസോസിയേറ്റ് എഡിറ്റർ വെങ്കിടേഷ് രാമകൃഷ്ണൻ ഉൾപ്പെടെ സാംസ്‌കാരിക, സാമൂഹിക മേഖലകളിലെ പ്രമുഖർ സമ്മേളനത്തിൽ പങ്കെടുത്ത് സംസാരിക്കും.
ഗസ്സയിലെ നിസ്സഹായരായ മനുഷ്യർക്ക് നേരെ ഏകപക്ഷീയമായ ആക്രമണമാണ് ഇസ്രായേൽ നടത്തുന്നത്. സ്ത്രീകളും കുട്ടികളും ഉൾപ്പെടെ പതിനായിരങ്ങൾ ഓരോ ദിവസവും മരിച്ചുവീഴുകയാണ്. ലോകം മുഴുവൻ ഇസ്രായേലിന്റെ നരവേട്ടക്കെതിരെ പ്രതിഷേധം അലയടിച്ചുകൊണ്ടിരിക്കുന്ന സാഹചര്യത്തിലാണ് മുസ്ലിംലീഗ് പ്രതിഷേധ പരിപാടി പ്രഖ്യാപിച്ചിരിക്കുന്നതെന്ന് സംഘാടകർ അറിയിച്ചു. ഐക്യദാർഢ്യ സമ്മേളനത്തിന്റെ പ്രചാരണത്തിനും പങ്കാളിത്തത്തിനും വേണ്ടി പ്രവർത്തകർ രംഗത്തിറങ്ങണമെന്ന് സംസ്ഥാന ജനറൽ സെക്രട്ടറി അഡ്വ. പി.എം.എ സലാം അഭ്യർത്ഥിച്ചു.