പാലക്കാട്: മോഹന്‍ലാലിന്‍റെ ജന്മദിനത്തോടനുബന്ധിച്ച് ഫാന്‍സ് അസോസിയേഷന്‍ വീല്‍ചെയര്‍ വിതരണവും അന്നദാനവും നടത്തി. ലാല്‍ കെയര്‍ സൗദി അറേബ്യ, തച്ചനാട്ടുകരയുടെ നേതൃത്വത്തിലാണ് പാലോട് സ്വദേശിനിക്ക് വീല്‍ ചെയര്‍ വിതരണം ചെയ്തത്.
മണ്ണാര്‍കാട് എടേരം അഭയം അനാധാലയത്തില്‍ അന്നദാനവും നടത്തി. വരും ദിവസങ്ങളില്‍ നിര്‍ദ്ധനരായ വിദ്യാര്‍ഥികള്‍ക്ക് ലാല്‍ കെയര്‍ സൗദി അറേബ്യ, തച്ചനാട്ടുകരയുടെ കീഴില്‍ പഠനോപകരണങ്ങള്‍ വിതരണം ചെയ്യുമെന്ന് ഭാരവാഹികള്‍ അറിയിച്ചു.
അഭയം അന്തേവാസികൾക്ക് ഒപ്പം കേക്ക് മുറിച്ചും പാട്ട് പാടിയും ചടങ്ങ് ആഘോഷമാക്കിയാണ് ലാലേട്ടൻ ഫാൻസ് പ്രവർത്തകർ പിരിഞ്ഞത്.
ലാലേട്ടന്റെ ജന്മദിനത്തോടനുബന്ധിച്ചുള്ള ക്ഷേമ പരിപാടികള്‍ക്ക് സംഘടന എക്സിക്യൂട്ടീവ് അംഗങ്ങള്‍ക്കൊപ്പം സെക്രട്ടറി ജിനേഷും ജോയിന്റ് സെക്രട്ടറി റിയാസും നേതൃത്വം നല്‍കി. വരും ദിവസങ്ങളിൽ കൂടുതൽ ചാരിറ്റി പ്രവർത്തനങ്ങൾക്ക് നേതൃത്വം നല്‍കുമെന്ന് സൗദി ലാൽകെയർ പ്രസിഡന്റ് റഹനീസ്, ട്രഷറർ സരിത്ത് തുടങ്ങിയവര്‍ പറഞ്ഞു.