തെരഞ്ഞെടുപ്പ് ഫലം ജനാധിപത്യത്തിന്റെ ഭാവി നിർണയിക്കുമെന്ന് മന്ത്രി പി.പ്രസാദ്

ആലപ്പുഴ : ലോക്‌സഭാ തിരഞ്ഞെടുപ്പ് ഫലം ഇന്ത്യൻ ജനാധിപത്യത്തിന്റെ ഭാവി നിർണയിക്കുമെന്ന് കൃഷി മന്ത്രി മന്ത്രി പി പ്രസാദ് പറഞ്ഞു . ആലപ്പുഴ പ്രസ് ക്ലബ്ബിന്റെ നേതൃത്വത്തിൽ നടന്ന മാതൃഭൂമി സ്‌പെഷ്യൽ കറസ്‌പോണ്ടന്റ് ജോയ് വർഗീസ് , കേരള കൗമുദി ആലപ്പുഴ യുണിറ്റ് ചീഫ് കെ ഡി ദയാൽ എന്നിവരുടെ അനുസ്‌മരണ സമ്മേളനം ഉദ്‌ഘാടനം ചെയ്യുകയായിരുന്നു അദ്ദേഹം . സ്വതന്ത്ര മാധ്യമ പ്രവർത്തനം പോലും കുറ്റകരമാകുന്ന അവസ്ഥയിലേക്ക് രാജ്യം മാറി . കഴിഞ്ഞ പത്ത് വർഷമായി മാധ്യമങ്ങളെ കാണാത്തയാളാണ് രാജ്യത്തിന്റെ അധികാര സ്ഥാനത്ത് തുടരുന്നത് . നിർഭയമായി മാധ്യമ പ്രവർത്തകർക്ക് സംസാരിക്കുവാൻ പോലും സ്വന്തന്ത്ര്യം ഇല്ലാതായി . ഭയം ഭരണകൂടമാകുമ്പോൾ ജനാധിപത്യം പ്രതിസന്ധിയിൽ ആണെന്നും മന്ത്രി കൂട്ടിച്ചർത്തു . പ്രസ് ക്ലബ്ബ് ട്രഷറർ സുരേഷ് തോട്ടപ്പള്ളി അധ്യക്ഷത വഹിച്ചു . പത്രപ്രവർത്തക യൂണിയൻ സംസ്ഥാന സമിതി അംഗങ്ങളായ , കെ എ ബാബു , ജലീൽ അരൂക്കുറ്റി , കേരള കൗമുദി ആലപ്പുഴ യുണിറ്റ് ചീഫ് കെ എസ് സന്ദീപ് , പ്രസ് ക്ലബ് സെക്രട്ടറി ടി കെ അനിൽകുമാർ എന്നിവർ സംസാരിച്ചു .